МАХ, МАХАН БҮТЭЭГДЭХҮҮН БОЛОВСРУУЛДАГ КОМПАНИУДЫН ЭЗЭД ОРОСУУДАД ЛААЗАЛСАН БҮТЭЭГДЭХҮҮН ХАНДИВЛАХЫГ ЗӨВШӨӨРЧЭЭ

     ОХУ-ын Элчин сайдын яамныхан Монголын махны холбооныхонтой уулзаж, их хэмжээний лаазалсан мах, махан төрлийн бүтээгдэхүүн хандивлахыг хүссэн байна. Учир нь, Оросууд дайны голомтдоо бэлэн байдлаа хангахын тулд хоол унд, хувцас хунараа дахин бэлдэж эхэлсэн гэх. Монголчуудыг муу мах буюу вакцин хийлгэсэн малын мах иддэг хэмээн оошоодоггүй байсан оросууд энэ удаад лаазалсан бүтээгдэхүүнийг онцолсон байна. Учир нь, лаазалсан бүтээгдэхүүнийг урт хугацаанд боловсруулж сайтар бэлддэг, хоёрдугаарт, хадгалах хугацаа урт, гуравдугаарт, тээвэрлэхэд амар болохыг харгалзан үзэж, тусламж хүссэн байна.  Харин тэдний хүсэлтийг мах, махан бүтээгдэхүүн боловсруулдаг компаниудын эзэд хүлээн зөвшөөрөхөөс өөр аргагүй болжээ. Хэрэв зөвшөөрөхгүй бол тэд ОХУ-аас зөвшөөрөл авч, агаарын замаар нь дамжин өнгөрч зарим улс руу мах, махан бүтээгдэхүүн гаргах эрхтэй болдог учир эрхээ хасуулахгүйн тулд зөвшөөрсөн гэх.

НЭГ АВТОМАШИНД 150 МЯНГАН ШИРХЭГ ЛААЗАЛСАН БҮТЭЭГДЭХҮҮН БАГТДАГ БАЙНА

      2022 оны хоёрдугаар сарын 24-нд Оросын цэргүүд Украины хилээр нэвтэрч, дэлхийн хоёрдугаар дайнаас хойшхи Европ дахь агаар, далай, хуурай замын хамгийн том довтолгоон болсон. Украин дахь “цэргийн тусгай ажиллагаа” нэрийн дор эхлүүлсэн ОХУ-ын ерөнхийлөгч Владимир Путины дайн нэг жилийн хугацаанд 100 мянга орчим украин цэрэг, түүнээс хоёр дахин олон оросууд амь үрэгдсэнийг НҮБ-аас  мэдээлжээ. Үүнээс гадна дайнд 8000 орчим энгийн иргэн амь үрэгдэж, найман сая гаруй хүн орон гэрээ алдаж, дүрвээд байна. Энэ дайн зөвхөн Орос, Украины хооронд болоогүй. Учир нь, дэлхий даяар үнийн хөөрөгдөл, хүнсний хомсдол өдөөж, газрын тосны үнэд илэрсэн.Энэ хар дайн хэзээ дуусахыг хэн ч мэдэхгүй. Тэд дайн удаан үргэлжлэхэд бэлтгэж байгааг дээр дурдсан. Оросуудын лаазалсан мах хандивлахыг хүссэн хүсэлтийг махны холбооныхон хүлээн зөвшөөрсөн учир хэдий хэмжээний бүтээгдэхүүн гаргах тухайгаа тооцоолж эхэлсэн байна. Тухайлбал, тэд нэг автомашинд 150 мянган ширхэг лаазалсан бүтээгдэхүүн багтана гэж үзсэн. Үүнтэй адил онгоцонд хэчнээн ширхэг багтах болохыг тооцоолж, хэдий хэмжээний тусламж үзүүлэх тухайгаа шийдэх аж.

ОХУ-ЫН ЭЛЧИН САЙДЫН ЯАМНЫХАН НООС, НООЛУУРЫН САЛБАРЫНХАНТАЙ УУЛЗАЖ, МАЛГАЙ, ОРООЛТ БЭЭЛИЙ ХАНДИВЛАХЫГ ХҮСЧЭЭ

     Тэд дайныхаа голомтод бэлэн байдлаа сайтар хангаж, дахин үргэлжлүүлэхээр бэлдэж байгаа гэх мэдээлэл бий. Мөн тэд манай улсаас зөвхөн лаазалсан бүтээгдэхүүн хандивлахыг хүсээд зогсохгүй ноос, ноолуурын салбарынхантай уулзаж, малгай, ороолт, бээлий, оймс гэх мэт хувцас хандивлахыг хүссэн нь дайн дуусах болоогүй илтгэж байна гэж хардаж болмоор байна. Ноос, ноолуурын салбарынхан оросуудад хэдий хэмжээний ямар тусламж үзүүлэх талаар ярилцаж, махны салбарынхантай мөн адил тооцоолол гаргаж байгаа гэх. Оросууд ийн дайндаа бэлдэхдээ Монголын ноос, ноолуур, махны холбооныхноос аминчлан тусламж хүссэн байна.