“Miss Mongolia-2024” тэмцээний тэргүүн мисс Б.Сувд-Эрдэнэтэй ярилцлаа.

-Сайн байна уу. “Miss Mongolia-2024” тэмцээний тэргүүн мисс болсонд баяр хүргэе. Баярын сэтгэгдлээ манай уншигчидтай хуваалцаач?

-Сайн байна уу. Намайг Баяраагийн Сувд-Эрдэнэ гэдэг, 21 настай. Аав минь Хэнтий аймгийн Бэрх хотын харьяа Костягийн Баяраа, ээж мөн Хэнтий аймгийн Норовлин сумын харьяа Гомбобаатарын Алтанцэцэг гэж хүн байдаг. Одоогоор миний бие АШУҮИС-д нүүр, ам судлаач мэргэжлээр суралцдаг.

“Miss Mongolia-2024” тэмцээний тэргүүн мисс болоод үнэхээр их догдолж баярласан. Бас Хэнтий аймаг гэж нутаг усаа, аавынхаа нэрийг дуудуулах, мөн миний нэрийг зарласны дараа надаас илүү баярлаж догдолж зогссон гэрийнхнээ харах үнэхээр сайхан мэдрэмж байсан. Одоо бол маш их хариуцлага мэдэрч байгаа. Монголын мисс гэдэг нэр хүндийг авч яваа учраас өмнөхөөсөө илүү хичээх хэрэгтэй гэж бодож байна.

-Мисс болоход гэр бүл нь их баярласан байх. Танд юу гэж хэлж, яаж хүлээж авсан бэ?

-Гэр бүлийнхэн маань маш их баярласан. Тэгээд энэ нэр хүндийг дагаад маш том хариуцлага ирж байгаа шүү гэдгийг сануулж байсан.

-Тэмцээний бэлтгэлээ хэрхэн хангасан бэ?

-Тэмцээний бэлтгэл хавраас эхэлсэн. Гэрийнхэн, ах дүү, найз нөхөд гээд бүгд тусалж дэмжсэн. Фитнесээр хичээллэдэг, загвар өмсдөг байсан нь бэлтгэл хангахад дөхөм байсан. Гэхдээ анагаахын хичээлийн хажуугаар авьяасын үзүүлбэрээ бэлдэх, бусад бэлтгэлүүдээ хангах, зураг авалтуудад оролцох дээр цаг заваа зохицуулахад бэрхшээл гарч байсан.

-Энэ жилийн тэмцээн их онцлог болсон санагдсан. Энэ талаар яриа дэлгэвэл?

-Энэ жил олон улсын гэсэн тодотголтойгоор зохион байгуулагдсан. Олон орноос оролцогчид ирсэн. БНСУ, ОХУ, БНХАУ зэрэг улсын үзэсгэлэнтэй охидтой найзууд болсон. Тэдний бэлтгэл нь маш сайн хангагдсан байсан. Тэр хэрээр илүү их хичээж, улс орондоо болж байгаа тэмцээний амжилтыг улсдаа үлдээнэ гэж зорьж оролцсон.

-Тайзнаа ямар үзүүлбэр үзүүлсэн бэ?

-Би Данзанравжаагийн "Үлэмжийн чанар" дууг тэмцээндээ зориулан сурч дуулсан. Эмэгтэй хүний бүхий л сайхныг магтан дуулсан, мөн өв соёлоо агуулсан энэхүү дууг миссийн тэмцээнд яг тохирох болов уу гэж сонгосон.

-Таны хүүхэд нас хаана, хэрхэн өнгөрсөн бэ?

-Би Хэнтий аймагт төрж, өссөн. Арван жилээ Дорнод аймагт төгссөн. Багаасаа олон спортоор хичээллэдэг, өвөө эмээ дээрээ их очих дуртай, амралт болгоноор хөдөө явдаг охин байсан. Морь унах, гол горхины чимээ сонсох, ууланд гарах их дуртай. Мөн гурван дүүтэй, айлын том охин. Багаасаа дүү нарынхаа өмнө хариуцлага хүлээж, зөв явах ёстой гэсэн үзэл бодол маань өнөөдрийн намайг бүтээсэн болов уу гэж боддог.

-Өмнө нь загварын тайзнаа алхаж байв уу. Хэзээнээс загвараар хичээллэх болсон бэ?

-Хэнтий аймагт “Авьяаслаг Хэнтийчүүд” гэж тэмцээн зохион байгуулагддаг. Энэ тэмцээн маань миссийн төрөлтэй бөгөөд 2022 онд миний бие Хэнтийн тэргүүн мисс болж байсан. Тэр үед тайзан дээр алхах, титэм зүүх мэдрэмж гайхалтай санагдаж, загварын агентлагт хамрагдаж, загварын гараагаа эхэлсэн.

-Үе үеийн миссүүдээс хэнээс нь үлгэр дуурайлал авдаг вэ?

-Миссүүдээс 2010 оны мисс Х.Бадамцэцэгээс үлгэр дуурайлал авдаг. Хувь хүнийхээ хувьд их таалагддагаас гадна адилхан шүдний эмчээр сурдаг байхдаа шагнал авч байсан болохоор хичээлийнхээ хажуугаар бүх зүйлсээ амжуулах урам зориг өгсөн.

-Мисс болохыг мөрөөддөг охидод бяцхан зөвлөгөө өгөөч?

-Хамгийн гол зүйл нь эмэгтэй хүн өөртөө итгэлтэй, өөрийгөө хөгжүүлэхийн тулд тууштай тэмцдэг байх хэрэгтэй гэж боддог доо.

-Цаашдын зорилгоосоо хуваалцаач?

-Надад өөртөө тавьсан маш олон зорилго байгаа. Юуны түрүүнд арваннэгдүгээр сард Япон Улсад болох “Miss international 2024” тэмцээнд надад итгэсэн энэ олон хүний итгэлийг алдалгүй, амжилттай оролцохыг зорьж байна.

-Ярилцлага өгсөнд баярлалаа.

-Баярлалаа.