• Өнөөдөр 2026-07-01

ДҮРЭЛЗЭН АСАГЧ "THE HU” ХАМТЛАГ

2024-07-07,   677

           Морин хуур, товшуур, цуу, лимбэ, төмөр хуур, хөөмий, хархирааг рок урсгалтай хослуулан бүтээлээ туурвиж дэлхийг тойрон тоглолтоо хүргэдэг "The Hu” хамтлагийнхан Монголдоо анх удаа тоглох нь.

    Анх энэ хамтлагийг МУГЖ Б.Дашдондог үүсгэн байгуулж, үүтгэл эхийг нь тавьсан гэдэг. Тэрбээр "Хүннү рок урсгалын санааг анх 2008 онд олж, түүнээс хойш есөн жилийн турш эрэл, хайгуул хийж, судалсны дүнд “The HU” хамтлагаа байгуулж байжээ. “Чонон сүлд”, “Юу вэ, юу вэ” дуугаа олон нийтэд цацаж эхэлснээс хойш долоон жил өнгөрч. Өдгөө бид хоёр цомог, дөрвөн сингл цомог гаргаж, Америк, Европ, Австрали, Ази тивд нийт 270 гаруй тоглолт хийсэн байна. Хамтлаг бий болж, бүтэн болсноос хойш залуус маань нэгэнтэйгээ эвтэй сайн нөхөрлөж, нэгнийгээ хүндэтгэж, нэр төрийг нь өндөрт өргөж яваа нь сайхан байдаг. “The HU”-гийн нөхөрлөл, хүндэтгэл бидний олсон хамгийн том шагнал байлаа" гэж ярьсан байдаг.

           Сонсох бүрд омогшил төрж, омог бардам, эрэмгий байхын илэрхийлэл төрдөг. Дэлхийд данстай тэднийг Чингис хаан одонгоор тамгалсан. Гэхдээ тэд эхлээд Хүннү рок гэх урсгалыг бий болгож, содон сонин энэ л төрлөөрөө онцгойрч яваа. Нээрээ үүссэн тухайд нь ганцхан хүнийг дурдаад өнгөрөмгүй. Дуучин Ц.Галбадрах, Г.Нямжанцан, Н.Тэмүүлэн, Б.Энхсайхан гэх хүмүүсийн бүрэлдэхүүнтэй анх байгуулагдаж, тив дэлхийд нэрээ хадаах, Монголоо таниулан хөтлөх, Монголынхоо хөгжмийн олон төрлийг рок урсгалтай нэгтгэн ертөнц даяар тэд эгшиглэж буй. Үүгээр нь, хүсэл мөрөөдлөөр нь, гэгээн үйлсээр нь бид бахархахгүй байх аргагүй.

      Анх "Хү" гэх нэрийг өгсөн тухайд Хүннү үгийн судалбарт эр, эм хүйс харгалзахгүй оюун ухаант хүмүүний эх үг нь хү гэсэн байдгаас улбаалан өгчээ. Эл хамтлаг 2019 онд анхны цомгоо "Гэрэг" нэртэйгээр гаргаж байжээ. Цомогт, “Wolf Totem”, “Yuve yuve yu”, “Shoog Shoog” тэргүүтэй нийт есөн дуу багтсан байдгийг сонсогчид хэдийнэ мэдсэн байх. Тэдний анхны дуу болох “Юу вэ, юу вэ, юу” дуу нь Youtube суваг дээр 2018 оны есдүгээр сард цацагдсан ба 117 сая хандалт авчээ. Анхны аялан тоглолтоо 2019 оны зургаадугаар сард эхэлж, Европын нийт 13 орноор 23 фестивальд амжилттай оролцсон юм. Хамтлагийн гишүүн Б.Энхсайхан "The HU” хамтлаг хүннү рокыг бүтээж, дэлхийд гарахын тулд долоохон жилийг золиогүй. Бидний зарим нь 20 гаруй жил хөгжим тоглосон, энэ урлагт цаг хугацаагаа зориулсан. Гэхдээ анх хөгжимтэй холбогдож, тоглож эхэлсэн маань ч энэ үйлийн төлөө байж магад. Анх эхэлж байхад олон шүүмжлэл ирсэн. Ардын урлагийг сөнөөж байгаа, цахилгаан хөгжимтэй хослуулж мөн чанарыг нь гутааж байгаа гэж их шүүмжилсэн. Гэхдээ бид өөрсдийн итгэл үнэмшилдээ бат байсан нь өдийг хүргэсэн гэж итгэдэг" гэсэн нь олон хүний бодлыг өөрчилсөн болов уу. Заримдаа бид аливаад хүмүүс их амархан амжилтад хүрч, нэр алдрыг олдог гэж эндүү бодох нь бий. Тэгвэл энэ нэрийг дэлхийн чинээ, монголчуудын бахархлын хананд өлгөхийн тулд тэр хэмжээний хөдөлмөр, зүтгэл, шинийг олж шигтгэхийн хүсэл хэрэгжсэн нь тодорхой.
      The Hu хамтлагийг байгуулахын тулд Б.Дашдондог ардын урлагийн бүх л уран бүтээлчидтэй уулзсан гэдэг. Тийм ээ үнэхээр ардын хөгжмийн олон хослол, цаанаа нэг монгол хүний дотор эгшиглэж, багаас тэтгэн бойжуулсан танил эгшиг энэ хамтлагаас мэдрэгддэг, сонсогддог. Үүнийг аваад дэлхийн тайзан дээр хүргэж, тэнд салхи салхилуулж, бороо шаагин оруулж, аянга нэргүүлж, илчит нараар гийгүүлнэ гэдэг том үйл мөн. Монгол гэх нэрийг өөрсдийн уран бүтээлээрээ дэлхийд зөөн хүргэгч илч довтлогчид бол тэд. Харин энэ удаад бид тэднийг эх орондоо сонсох нь. Тэдний эрчит салхинд хуйларч, эрэмгий зоригт нь омогшиж зогсох нь. Амьд хөгжмийн галыг тэд асааж, тэр галын очит чимээнд ахуйгаас нэгэнтээ тасарч, монгол уламжлалт хөгжмөө орчин цагийн цахилгаант хөгжимтэй ижилсүүлэн сонсож, эх орноороо, эрхэм оршихуйгаа бүрнээ мэдрэх нь. Домогт дуучин Элтон Жон тэдний талаар "Би рок хөгжмийн хөгжлийг нэг шат ахиулсан учраас Хатан хаанаас баатар хэргэм хүртсэн. Харин надаас хойш рокыг дахин нэг шат ахиулсан хамтлаг бол “The HU” шүү. Тийм ч учраас би танай хөгжмийг сонсдог, хүндэлдэг” гэсэн гэдэг. Тэд бол дүрэлзэн асагч, түнэр харанхуйд ч бөмбөрөө цохих, төгөлдөр, хийморьт монгол хүннү.

ДҮРЭЛЗЭН АСАГЧ "THE HU” ХАМТЛАГ
Шинэ мэдээ
Нийтлэлчид
Монгол Улс, Улаанбаатар хот, Сүхбаатар дүүрэг, VIII хороо, "Ардын эрх"-ийн байр, Гуравдугаар давхарт Эргэлт.мн редакц
7509-1188
[email protected]
2026 © Зохиогчийн эрх хуулиар хамгаалагдсан. Мэдээлэл хуулбарлах хориотой.