Мake up артист Т.Пүрэв-Эрдэнэтэй ярилцлаа. Тэрбээр Азийн гоо сайхан, үс засалтын ур чадвар солилцох тэмцээнээс гуравдугаар байрын шагнал хүртсэн билээ.

-Сайн байна уу. Танд энэ өдрийн мэнд хүргэе. Анх нүүр будалтын артист болохоор шийдсэн үеэс ярилцлагаа эхлэх үү?

             -Сайн байна уу?  Намайг Төмөрбаатарын Пүрэв-Эрдэнэ гэдэг Архангай аймгийн Цэцэрлэг суманд 10 жилээ дүүргэсэн. Би хүүхэд байхаасаа зурах л дуртай даруухан охин байсан.  Хөдөөний хүүхэд болоод ч тэр юм уу нэлээн улаан хацартай. Үүнийгээ дарах гэж анх нүүрээ будаж эхэлсэн. Сурагч байхдаа тохирох кремээ сонгож чаддаггүй байсан болоод ч тэр үү будахаар улаан хацар минь улам хөхөрөөд сонин харагдаад, будахаа больсон байсан юм. Тэгээд оюутан болоод 2021 онд мэргэжлийн нүүр будалтын артист бэлтгэх сургалтад суусан. Тэр үеэс өөрийгөө хэрхэн өөрчлөгдөж байгааг хараад “Илүү хөөрхөн болжээ” гэж бодож эхэлсэн. Ер нь өөртөө итгэлтэй болж үргэлжлүүлэн  мэргэжлийн нүүр будалт сурах хүсэл маань нэмэгдсэн.  Одоо олон хүнийг өөртөө итгэлтэй, хайртай болгохын тулд ажиллаж байна. Хүн өөрийгөө зөв будаад сурчих юм бол өөрийнхөө анзаарч байгаагүй гоо үзэсгэлэнг тодруулж, өө сэвээ ч нуух боломжтой болдог доо.

-Аsian Beauty & Hair dressing skills exchange competition-д Алтан Гар Монголын Үсчин Гоо Засалчдын Мэргэжлийн Холбоо хамт олноороо монгол улсаа төлөөлөн уригдсан байсан. Энэ талаар яриа дэлгэвэл?

            -Анх тэмцээнд явах санал аваад маш их догдолсон. Орон орны мундаг хүмүүстэй  тэмцээнд оролцоод маш том туршлага хуримтлуулаад амжилттай яваад ирсэн. Миний хувьд bridal make up, smokey make up гэсэн хоёр төрөлд оролцсон. Тэгээд bridal make up төрөлд гуравдугаар байр, smokey make up дөрөвдүгээр байрыг тус тус эзлээд ирсэн. Өөрийгөө шинээр нээсэн маш сайхан тэмцээн болсон.

-Та өмнө олон улсын чанартай тэмцээнүүдэд оролцож байв уу?

               -Өмнө Монгол Улсдаа зохион байгуулагдаж буй тэмцээнд байнга оролцдог байсан. Энэ удаа анхныхаа олон улсын тэмцээнд оролцсон.  Анхны бүхэн сайхан байдаг шүү дээ. Цаашдаа илүү олон гайхалтай хаалга өмнө минь нээлттэй байгаа гэж найдаж, өдөр бүр тууштайгаар хичээж байна даа.

-Дэлхийн аваргын бэлтгэл эхэлсэн байх. Энэ жил манай улс ямар баг бүрэлдэхүүнтэйгээр яаж оролцох төлөвлөгөөтэй байгаа бол?

                -Тэмцээний талаар тодорхой мэдээлэл өгөх боломжгүй байгаа.  Тэмцээн дөхөхөөр холбооноос мэдээлэл гаргаад,  оролцох артистуудаа зарлах байх гэж бодож байна.

-Нүүр будалтын хамгийн чухал зүйл, түгээмэл гаргадаг алдаа юу вэ?

             -Эмэгтэйчүүдийн түгээмэл гаргадаг алдаа ихэвчлэн крем сонголт, өнгөний зохицол байдаг. Өөртөө тохирсон кремны өнгийг шанаа болон цээж хэсэгт тааруулан сонгож хэрэглэх нь хамгийн зөв байдаг. Мөн арьсандаа  тохирсон чанартай бүтээгдэхүүн сонгон аваарай. Чанаргүй, гаралт муу, тогтоц хурдан бүтээгдэхүүн нүүр будалтын төгс болгож чадахгүй шүү дээ.

-Хүүхэд нас, гэр бүлийнхээ талаар яриа дэлгээч?

                -Аав, ээж минь малчин хүмүүс байдаг. Миний бага нас хөдөөгийн хүүхдийн л адил амралтаараа хөдөө очиж гэр бүлдээ тусалж л өнгөрсөн дөө.  Гурван дүүтэй айлын том охин болохоор илүү бие даасан хариуцлагатай байсан гэж боддог. 10 жилдээ даруухан бусдын үгнээс гардаггүй энгийн охин байсан. Арван жилээ төгсөхдөө эмч болно гэж боддог байлаа. Ер нь аав, ээжийн минь хүсэл байсан гэх үү дээ.

-Их сургуулиа ямар мэргэжлээр төгссөн бэ?

           -Одоо Урлах эрдэм дээд сургуульд хувцас дизайнер мэргэжлээр суралцаж байгаа. Мөн хувиараа нүүр будалт хийж, сургалт явуулж байна даа.

-Та ярилцлагын төгсгөлд мэргэжлийн артист хүний хувьд дөнгөж нүүрээ будаж эхлэх  гэж буй охидод  зөвлөгөө өгөөч?

         -Ер нь хамгийн түрүүнд яг өөртөө тохирсон зүйлийг мэргэжлийн хүнээс зөвлөгөө авч сонговол зүгээр байдаг шүү.  Хүн бүр өөр өөрийн гэсэн онцлогтой арьстай, нүүрний бүтэцтэй байдаг. Үүнийг маш сайн анхаараарай. Хэн нэгний сошиалаар зөвлөж байгаа бүхэн танд таарна гэж байхгүй. Эхлээд юүтүб, тик ток, интернэтээс зөвлөгөө уншаад, будалтын бичлэг дагаж хийгээд үз. Олон дахин давтаад байх тусам будалтын чадвар чинь дээшилнэ гэж хэлмээр байна.

-Ярилцсанд баярлалаа. Цаашдын ажилд нь амжилт хүсье.

                -Баярлалаа.