Зуныг зугаатай болгох шоу, тоглолтуудыг багцлан хүргэж байна.

"PLAYTIME FESTIVAL"-2024

            Ирэх долдугаар сарын  4-7 өдрүүдэд Налайх дүүрэгт  "PLAYTIME FESTIVAL" нь 22 дахь жилдээ болох гэж байна. Тоглолтод Headliners буюу голлох уран бүтээлчид post-metal урсгалаар тоглодог Америкийн алдарт Deafheaven, домогт Нирвана хамтлагийн Курт Кобейны хамгийн хайртай хамтлаг болох alternative rock урсгалаар тоглодог Teenage Fanclub, Өмнөд Солонгосын Idiotape, Японы алдарт TOE, Шведийн домогт метал хамтлаг Vomitory, орчин цагийн дэлхийн хөгжмийн ертөнцийн анхаарлыг татаж буй залуу хамтлагууд болох Өвөр Монголын Narabara, Тайваны Elephant Gym зэрэг хамтлаг уран бүтээлчид багтжээ.

Тасалбарын үнэ: Дөрвөн өдрийн тасалбар 600 мянган төгрөг, vip тасалбар- хоёр сая төгрөг.

“THE NIGHT” WITH US

       “THE NIGHT” WITH US тоглолт наймдугаар сарын 10-нд Төв цэнгэлдэх хүрээлэнд тоглогдохоор болжээ.

       Тоглолтод “Никитон”, “Камертон”, “Хаянаа&Дээгий”, “3 охин”,  “Хар сарнай” зэрэг хамтлаг дуучид нэгэн тайзнаа тус бүрийн бүх цаг үеийн хит дуунуудаа дуулах юм байна. Тоглолтод  60 гаруй   хит дуу дуулагдана. 

Тасалбарын үнэ: Үндсэн үнэ 88 мянган төгрөг, Эртэч шувуухай тасалбар 68 мянган төгрөг.

"ЭНЭ МӨЧ" LIVE CONCERT     

                Реппер Гинжин, Mrs M нарын хамтарсан “Энэ мөч” тоглолт наймдугаар сарын 17-нд Төв цэнгэлдэх хүрээлэнд болохоор болжээ. Өнөө цагийн хип хоп хамгийн тод гялалзаж буй уран бүтээлчдийн төлөөлөл болсон тэдний тоглолт  Төв цэнгэлдэх хүрээлэн дүүргэж, энэ зуны хамгийн зугаатай шоу, тоглолтуудын нэг болно гэдэгт итгэлтэй байна.

Тасалбарын үнэ: 60.000, VIP тасалбар 500 мянган төгрөг.

“JAH KHALIB MONGOLIA-2024”

                 "Медина", "Созвездие ангела", "Лейла" зэрэг дуугаараа монголчуудын танил болсон Бүгд Найрамдах Казакстан Улсын шилдэг реппер, артист Jah Khalib бүрэн хэмжээний тоглолтоо 2024 оны наймдугаар сарын 17-нд Монгол Улсад хийх гэж байна. Энэ удаад тэрбээр өөрийн амьд хөгжмийн баг, гэрэлтүүлэг, хөгжим, лед инженерийн багийнхантайгаа бүрэн бүрэлдэхүүнээрээ ирэхээр болсон байна.  Тэрбээр юүтүбд 1.62 сая,  инстаграммд 2.5 сая дагагчтай билээ.

            Тоглолт Shoppy park-д зохион байгуулагдах бөгөөд тоглолтод зориулан бүрэн хэмжээний бүтээн байгуулалтыг ерөнхий зохион байгуулагч “DD Entertainment” компани, хамтран зохион байгуулагч BlinkSoft”, “CGI Originals” болон “Enter Media Agency” гүйцэтгэж байна. Тодруулбал, 10,000 м2 талбайг зүлэгжүүлэх, хоёр ширхэг супер VIP бүтээн байгуулалтыг Mega stage-ийн хамт хийхээр төлөвлөжээ

Тасалбарын үнэ: Үндсэн үнэ-150.000,  VIP тасалбар- хоёр сая төгрөг

Реппер “BIG GEE”- "THE LEGACY" BIG CONCERT

                Big Gee-ийн дөрөв дэх тоглолт болох "THE LEGACY"  ирэх наймдугаар сарын 24-нд “Hit park”-д болно.   Жий өнгөрсөн жилүүдэд  “Боловсролгүй сэхээтний тавигдахгүй илтгэл”(2008 ), “Мөнгөгүй хүний цомог”(2009), “Монгол реппер” цомог (2010), Жонон хамтлагтай хамтарсан “Монголз” цомог (2011), “Geeometry”(2014) зэрэг есөн цомгоо тус тус гаргасан. Мөн олон арван хит дууг бүтээж, уран бүтээлүүдээрээ нийгэм, улс төрийг шүүмжилсээр ирсэн. Мөн дүү “Real” продакшныг үүсгэн байгуулж, шинэ үеийн олон чадварлаг уран бүтээлчдийг гаргаж ирсэн байдаг.

Тасалбарын үнэ: Үндсэн үнэ 80 мянган төгрөг.