Хүүхэд ахуй насандаа “Маск”-ын хошин шогийг үзэж, анх жүжигчин А.Гэрэлцэцэг гэх үзэсгэлэнтэй эмэгтэйг эчнээ мэддэг болж билээ. Харин энэ удаа “16 дахь хавар” киногоор тэс ондоо Гэрэлээг олж харлаа. Тэр яг л цэцэг шиг хаврын цасан дундаас дэлгэрч, тийм нэг ариун эмзэг хэр нь аз жаргал, тайвшрал бэлэглэсэн гэгээн дүрийг бүтээжээ. Энэ киноны талаар ярихаасаа урьтаж, жүжигчин А.Гэрэлцэцэгийн урлагийн замналын талаар хүүрнэх нь зүйтэй болов уу.

            Алтан гадас одонт жүжигчин А.Гэрэлцэцэг Улаанбаатар хотод төрж,  57 дугаар сургуульд суралцсан байдаг. Хүүхэд байхын адтай сэргэлэн байсан Гэрэлээ  2004 онд Соёл Урлагийн Их Сургуулийн  жүжигчин, найруулагчийн ангийг төгссөн. Түүнийг сургуулиа төгсөх жил МУГЖ Б.Ариунболд хамтлагтаа тоглох санал тавьснаар А.Гэрэлцэцэг хошин урлагийн салбарт хөл тавьж байсан түүхтэй.

           Удалгүй “Өнгөт инээд” хамтлагт орсон ч  2006 онд МУГЖ П.Эрдэнэзаан, Ж.Мөнхсайхан, М.Баярмагнай нартай хамт өрх тусгаарлан “Маск” продакшныг байгуулж байсан юм. Уншигч та бүхэн жүжигчин А.Гэрэлцэцэгийг “Эгч дүү гурав”-ын ээж, “Цэрэг найз” нягтлан бодогч, “Шилдэг жүжгүүд”-ийн Луугийн ээж / Юнивишны 803 дугаар суваг дээр гардаг, “HBO”-ийн хийсэн, “Game of thrones” киноны гол дүр Луугийн ээж байна/ зэрэг хөгжилтэй, ухаарал хайрласан хошин урлагийн дүрүүдээр нь андахгүй мэдэх биз ээ.  

А.Гэрэлцэцэг дэлгэцийн уран бүтээлд тийм ч олон тоглоогүй байдаг. Гэхдээ бүтээсэн дүр бүхнээ тултал гаргаад, инээж суудаг даруухан уран бүтээлч. Түүнд найруулагчид эротик киноны дүр бүтээх санал их тавьдаг учир тэр төдийлөн дэлгэцээс хол байсан гэдэг. Харин “247 градус” киноны зохиол таалагдаж, анхны гол дүрээ бүтээж байсан гэнэ. Үүний дараа “Бүсгүйчүүд хайрыг хүснэ”, “Соёлын довтолгоо”, “Миний хүүтэй гэрлээч” киноны гол болон туслах дүрүүдийг бүтээсэн. Харин тэр Анжелина Жоли шиг дайчин эмэгтэйн дүрд тоглохыг хүсдэг гэнэ. Мөн үлгэрийн сэдэвт кино хийхийг мөрөөддөг байна. Мөн Гэрэлээ “MN25” суваг телевизийн “Их хотын үдэш” цэнгээнт нэвтрүүлгийг хөтөлж байх үедээ сэтгүүлч мэргэжил эзэмшсэн. Энэ талаараа "Би сэтгүүл зүйн хүн биш учир мэдлэг туршлага дутаж байсан. Тиймдээ энэ урлагийг хүндэтгэх үүднээс мэргэжлийн түвшинд сурч судлах ёстой гэж бодож, сэтгүүлчээр сурсан" гэсэн байдаг. 

          Гэрэлээ арав гаруй жил идэвхтэй уран бүтээлээ туурвиж байгаад хэсэг хугацаанд урлагаас хөндийрсөн. Харин тэр эргэж ирэхдээ анхны бие даасан уран бүтээл болох “Ээжүүдийн өдөр өнжүүлэх” уран сайхны киног бүтээж, дуулиантайгаар ажилдаа орж байлаа.

              Энэ  талаараа тэр “Миний хувьд нэлээд хожуу хүнтэй сууж, хүүхэдтэй болсон учраас ээж байх, эмэгтэй хүн байх хоёрын ялгаа их хурц мэдрэгдсэн. Хүүхэдгүй байхдаа би зүгээр л хий хоосон, үүлэн дээр хөвж явсан байна лээ. Эгч маань алдарт эх, олон хүүхэдтэй сайхан эмэгтэй бий. Өмнө нь эгчийгээ цамцных нь энгэр онгорхой, хоёр талдаа хүүхдүүддээ хэвтүүлчихсэн хөхүүлж байхыг харангуутаа “Эгч ээ, та үс гэзгээ янзлаад, цэгцтэй сууж байгаад хөхүүлж болдоггүй юм уу?” гэж асууж байсан. Одоо бодохоор  сэтгэл дотроо эгчээсээ уучлалт гуйдаг. Би өөрийгөө ээж болохоор хүүхдээ ч харна, ажлаа ч хийнэ, би супер байх ёстой гэж бодсон. Эцсийн эцэст хэзээ ч тийм биш юм байна лээ.

              Тэгээд ээж  нарт тулгардаг энэ асуудлыг хүмүүс тэр бүр мэддэггүй, мэдсэн ч хөнддөггүй юм байна.  Үүнийг би хийе, гаргаж харуулъя. Сэтгэл гутралтай байгаа эмэгтэйчүүдэд урам өгье гэж зориглосон. Би 35 насандаа гэр бүл зохиосон юм. Энэ хүртлээ  гэр бүлийн амьдрал, хосын харилцааг судалдаг байсан. Тэгсэн нэг нийтлэг байгаа нь хосууд хүүхэдтэй болоод салаад байдаг. Үүнийг даван туулахад нь туслах, ойлгуулахыг л хүссэн” гэсэн байдаг.

ХООЛНЫ САРУУЛ

          Харин энэ хэсэгт дээр дурдсан “16 дахь хавар” киноны талаар бичье. Жүжигчин А.Гэрэлцэцэг гэхээр гэрэлтсэн алаг нүд, хөгжилтэй дүрүүдээр нь нүдэнд буудаг. Харин тэр энэ удаа “16 дахь хавар” уран сайхны киноны хоолны Саруулын дүрийг нямбай гэгч нь бүтээж, өөрийгөө ийм хэмжээний уран бүтээлч шүү гэдгээ дахин баталчихлаа. Гэхдээ Гэрэлээ дүрээ тултал бүтээчхээд, даруухан инээсээр явдаг тийм л энгийн эмэгтэй.

“16 дахь хавар” уран сайхны киног энд цухас тэмдэглэвэл,

               Уг кино 1990-2005 оны бидний амьдралыг элдэв хольц үгүй, яг л Саруулын хоол шиг тийм энгийнээр дэлгэж үзүүллээ. Хоолны Саруул, шил Төөгий хоёрын хоршил үнэхээр чамин юм аа. Тэд тухайн үеийн эмэгтэйчүүдийн тэвчээртэй дайчин зан, хүүхдүүдийн хэрсүү занг “Яг энэ шүү дээ, ийм л байсан” гэж эрхгүй бодогдтол гаргажээ.

          Айл айлын хаалга тогшиж, шил гуйж аваад, угааж цэвэрлээд, зөрлөгөөр хоол зарах ээж, охин хоёр хайрламаар сайхан юм. Орхиод явсан нөхөр, борог амьдрал, тэдний талаар шивнэлдэх хүмүүсийг тоолгүй 10 километр газар чаргаар гулууз мах жилийн дөрвөн улиралд зөөнө. Охиноо орны хөлөөс уяж орхиод, амь зуухын талд хоолоо зарна. Ядарч, ганцаардаж, цөхөрмөөр байсан бяцхан үрийнхээ ход ход инээх чимээ, үнэгчлэх царайгаар л хүч орох ээжийн дүр хэчнээн уярам сайхан байсан гэж санана. Энэ яг л 1990-ээд оны эмэгтэйчүүдийн нийтлэг төрх шүү дээ. Эх хүн өөрөөсөө урьдаж хүүхдээ боддог ийм л сул талтай. Тийм уужим сэтгэл, ухаан, тэвчээр ээж хүнд л байдаг байх. Ингэж амьтай гаргаж, үзэгчдэд мэдрүүлэхийн тулд кино баг Гэрэлээг сонгосон байх гэж таамаглана.

        Ганбаттай учирч гуньж алхдаг замаараа инээмсэглэн 18 настай жаахан охин шиг хөтлөлцөн алхахыг харж, хамт догдоллоо. Охины аав Цэнгэл эргэж, ирэхэд Ганбаттай хамт гуниглаж, басхүү Цэнгэлийг яах гэж ирдэг байна гэж бухимдав. Гэвч Саруул огт тэгсэнгүй. Эцсээ хүртэл охиноо гэсээр л дуусаж байгаа юм. Ганбат эргэж ирэх болов уу гэж харуулдаж сая нэг ирэхэд уужирч  киногоо дуусгалаа. Хуучин шатар шигээ үнэ цэнтэй хүн бол яах аргагүй Ганбат байлаа. Тэр үнэн сэтгэлээсээ Саруул, Төгөлдөр хоёрыг хайрлаж, жаргалтай төгсөхийг харах хэчнээн сайхан байв аа.  Үнэн жүжиглэлт ийм л байж, үзэгчдийн сэтгэлд хүрдэг  дээ.

            Ингээд бодоход жүжигчин А.Гэрэлцэцэг дүр бүтээхдээ маш их судалж бүтээдэг. Аливаа ажил хийхдээ төгс хийхийг зорьдог. Зорьсон шигээ бүтээж чаддаг уран бүтээлч юм аа.  Уншигч та бүхэн зорьж суугаад, өнгөрсөн түүхээр нэг “аялж”, дотоод сэтгэлээ тольдоод нэг үзээрэй.