“Нэг найзыгаа шинэ байранд орсон гээд найзуудаараа нийлж, эзгүйд нь гэнэтийн бэлэг болгоод тавилга хийж өглөө. Шокноосоо одоо гараагүй байгаа даа” хэмээх твиттерт жиргэсэн жиргээг уншаагүй хүн цөөн биз ээ. Бид тус гэнэтийн бэлгийн эзэн Т.Эрдэнэбаатартай ярилцлаа.

-Шинэ байранд орсонд баяр хүргэе. Манай уншигчдад өрийгөө танилцуулахгүй юу?

-Намайг Түмэнбаярын Эрдэнэбаатар гэдэг. Нийслэлийн шүүх шинжилгээний газрын Зам тээвэр, осол хэрэг хариуцсан тасагт шинжээчээр ажилладаг. Төрийн албанд 13 дахь жилдээ ажиллаж байна. Эхнэр, хоёр хүүгийн хамт амьдардаг. Булган аймгаас 2002 онд оюутан болж ирээд л Улаанбаатар хотодсуурьшсан даа.

-Шинэ байрандаа хэзээ орсон бэ. Найзуудынхаа гэнэтийн бэлгийн талаар сэтгэгдлээ хуваалцахгүй юу?

-Эхнэр бид хоёр монгол гэрт тав, дараа нь хашаа, байшинд долоон жил амьдарсан. Харин өнгөрсөн долоо хоногийн хагас сайн өдөр шинэ байрандаа орлоо. Эхнэр бид хоёрын уйгагуй хөдөлмөрийн үр дүнд хүүхдүүдээ дулаан байртай болгож, баяр хөөр дүүрэн байна. Бид байрандаа орсон өдрөө эхнэрийнхээ нутаг руу хэд хоног амрахаар явсан юм. Найзууддаа бид ээлжийн амралтаа авсан тул хэд хоног хөдөө явахаар боллоо гэдгээ хэлсэн юм. Гэтэл тавилгын үйлдвэрт ажилладаг найз маань манай эхнэр рүү “Та хэд хөдөө явах гэж байгаа гэсэн үү.

Найздаа түлхүүрээ орхиод яваарай. Би шинэ байраар нь орж үзэх гэсэн юм. Санаа зоволтгүй ээ. Та хэд сайхан, тайван амарчихаад ир” гэж ярьсан байна лээ. Манай эхнэр тухайн үедээ гайхасхийгээд л түлхүүрээ орхисон гэсэн. Тэгээд уржигдар орой хотод ирээд найзынхаасаа очиж, түлхүүрээ аваад бид дөрөв гэртээ ирсэн. Ороод ирсэн чинь гэрэлтэй, тавилгатай болчихсон байсан. Гайхаад бүүр хаалгаа андуурчихаж гээд эргээд гарцгаасан гээд л бод.

Тоотоо шалгаад, түлхүүрээ үзсэн чинь яах аргагүй мөн байхаар нь буцаж ороод гайхаад сууж байтал найз маань залгаад “За, тавилга таалагдсан уу” гэхээр нь л итгэсэн. Гэхдээ найзыгаа тавилгын үйлдвэрт ажилладаг болохоор нь манайд тавилга хийж өгсөн байна гэж гадарлаад сууж байсан юм.

-Хэдэн жил нөхөрлөж байгаа вэ, та хэд?

-Бид 2003 оноос хойш 17 жил найзалж байна. Бид 13 уулаа нийлдэг юм. Нэгнийхээ жаргал, зовлон, гуниг, баяртай бүхий л үед хамт байдаг. Найзууд маань бүгд санхүүжилтээ гаргаад, хэдхэн цагийн дотор тавилгуудаа угсарсан гэсэн. Энэ ташрамд, найзууддаа, тавилгын үйлдвэрийнхэнд, бүгдэд нь чин сэтгэлээсээ баярлалаа гэдгээ хэлмээр байна. Сайхан байранд, сайхан тавилгатай амьдрах болсондоо маш их баяртай байгаа. Биднээс илүү миний хоёр хүү маш их баяртай байгаа.

-Өмнө нь та хэд нийлж найзуудынхаа амьдралд тусалж байсан л байх даа?

-Манай нэг найзын эхнэр нь өнгөрсөн жил тал харвасан юм. Эмнэлгийн байгууллагаас ямар ч найдваргүй гэсэн хариу өгсөн. Тэгээд найзуудаараа нийлж байгаад эмчилгээнийх нь зардлыг гаргаад эмчлүүлсэн. Одоо тэр найз маань хөл дээрээ алхаж, ганцаараа явдаг болсон. Бидэнд энэ мэт хамтдаа бүтээсэн баяртай үйл явдал зөндөө бий. Цаашдаа ч бие биедээ түшиг тулгуур болж, жаргал, зовлонгоо тэнцүү хувааж, үүрнэ гэж боддог.