Өмнөговь аймгийн Цогтцэций болон Манлай сумын заагт оторлож байсан 34 настай жирэмсэн эх цус алдаж, энэ сарын 15-нд Манлай сумын эмнэлэгт дуудлага өгсөн байдаг. Дуудлагын дагуу Өмнөговь аймгийн Бүсийн оношилгоо, эмчилгээний төвийн төрөх тасгийн эрхлэгч Д.Отгонжаргал, төрөх эмэгтэйчүүдийн зөвлөх эмч Б.Мөнхбат, нярайн зөвлөх эмч С.Алтанцэцэг, мэдээгүйжүүлэг, эрчимт эмчилгээний эмч Х.Оюунсувд, сувилагч Ц.Мөнхдэлгэр, М.Нандинболор, жолооч Цолмон болон Уламбаяр даргатай Манлай сумын Эрүүл мэндийн төвийн баг, Эх эмч Монголжингоо ахлагчтай Цогтцэций сумын эрүүл мэндийн төвийн баг хамтран яаралтай тусламж үзүүлж, отрын гэрт хагалгаа хийж, эх, хүүхдийн амийг аварсан  билээ. Тэдэнд анхан шатны тусламж, үзүүлж, цус алдалтыг тогтоосон Манлай сумын Эрүүл мэндийн төвийн дарга Д.Уламбаяртай ярилцлаа.

-Жирэмсэн эмэгтэй цус алдаад байна гэх дуудлага танай эмнэлэгт анх ирсэн юм билээ. Анхан шатны тусламж, үйлчилгээг хэрхэн хийсэн бэ?

      -Манай эмнэлэгт энэ сарын 15-нд оторлож явсан Ноён сумын харьяат 34 настай жирэмсэн эмэгтэй их хэмжээний цус алдаад байна гэх дуудлага, мэдээллийг авсан. Дуудлагын дагуу Манай эмнэлгийн бүрэлдэхүүн шаардлагатай багаж, төхөөрөмж болон эм, тариа авч явсан. Мөн дуудлага өгөх үед нь өвчтөний цусны бүлгийг асууж, тохирох донор цусыг манай эмнэлгийн эмч нар аваад надаас түрүүлж явсан. Бид дуудлагыг аймгийн БОЭТ- рүү дамжуулж, түргэн тусламжийн баг нэмэлтээр шаардлагатай болохыг мэдэгдсэн. Мөн тус Цогтцэций сумын түргэн тусламжийн багийг дуудсан. Би дуудлагаа өгч дуусчихаад эмч нарынхаа авч яваагүй үлдээсэн багаж, эм, тариаг бүртгэж хойноос нь хөдөлсөн. Очсон даруйдаа жирэмсэн эмэгтэйн цусыг тогтоож, донор цусаар сэлбэж, эм, тариагаар шингэнийг нөхөж, гэрт хагалгаа хийхэд бэлдэж, тавилга, орыг янзалсан.

-Жирэмсэн эмэгтэй юунаас болж цус алдсан байсан бэ?

     -34 настай эмэгтэйн зургаа дахь төрөлт байсан. Түүний төрөх хугацаа гуравдугаар сарын 1-н байсан ч хүйтэнд хүнд хүчир ажил хийсний улмаас ихэс нь ховхорч, их хэмжээний цус алдсан байсан.

-Тус айл аймгийн төвөөс хэдэн километр зайтай вэ. Аймгийн эмч нар хэр удсан бэ?

      -Тухайн айл аймгийн төвөөс 170 гаруй километрийн зайтай учир эмч нар маш хурдан ирсэн. Ирсэн даруйдаа жирэмсэн эмэгтэйд хагалгаа хийж, эх, хүүхдийн амийг аварсан.

-Одоогоор эх, хүүхдийн биеийн байдал ямар байна вэ. Эмнэлэгт хүргэгдсэн үү?

      -Эх, хүүхдийг хагалгаа хийж, тайвшруулсны дараа Цогтцэций сумын эмнэлэгт хүргэсэн. Манай эмнэлэг эмчилгээ эрхлээгүй учир биеийн байдал нь ямар байгааг мэдэхгүй байна.

-Танд өмнө нь отрын гэрт жирэмсэн эмэгтэйд хагалгаа хийхэд анхан шатны тусламж, үйлчилгээ үзүүлж байсан тохиолдол бий юү?

      -Би Манлай сумын эмнэлгийн даргаар ажилладаг болохоор алсын дуудлагад маш их явж, өвчтөнүүдэд анхан шатны тусламж үзүүлдэг байсан. Харин отрын гэрт жирэмсэн эмэгтэйд хагалгаа хийхэд анхан шатны тусламж үзүүлсэн анхны тохиолдол боллоо.

      Мөн бид гэртээ төрсөн 34 настай эмэгтэйн ээжтэй холбогдож, тэдний биеийн байдал ямар байгаа талаар тодруулсан юм.

-Охин, зээ хоёрынх нь  биеийн байдал ямар байна вэ. Эмч нар ямар эмчилгээ хийж байга вэ?

      -Охин, зээ хоёр минь маргааш аймгийн эмнэлэг рүү шилжихээр болсон. Охин минь сар гаруйн өмнө хагалгааны тусламжтай төрсөн болохоор хүүхэд нь байнга хүчилтөрөгчтэй байгаа. Тэднийг удаан хугацаагаар автомашинд тээвэрлэх боломжгүй байсан учир сумын эмнэлэгт хэд хоног эмчилж байгаад аймаг руу шилжүүлж байгаа юм. 

-Охиных нь их хэмжээний цус алдсан шалтгааныг эмч нар хэрхэн тайлбарласан бэ?

      -Малчин учраас хүйтэнд хүнд ажил хийснээс болж их хэмжээний цус алдсан байна гэсэн. Эмч нарыг очиход гурван литр орчим цус алдсан байсан гэсэн. Харин эмч нар болон эм, тарианы хүчээр охин минь амьд үлдсэн. Хэрвээ эмч нар ирээгүй удсан бол охины минь цус юүлэгдэж дуусах байсан байна лээ.