Улсын өсөх идэр начин Э.Энхбат өчигдөр таалал төгссөн. Тэрээр олимпын аварга Н.Түвшинбаярт найман сар гаруйн өмнө зодуулсны улмаас тархиндаа хүнд гэмтэл авсан билээ. ГССҮТ-ийн эмч нар түүнд хоёр ч удаа мэс засал хийсэн ч өнөөдрийг хүртэл ухаан ороогүй юм. Ар гэрийнхэн нь түүнийг ГССҮТ-ийн Эрчимт эмчилгээний тасагт эмчлүүлэхээс гадна БНСУ-д цөөнгүй сар эмчлүүлсэн. БНСУ-ын эмч нарын зөвлөснөөр түүнийг зургаа хоногийн өмнө эх оронд нь авчран "Сонгдо" эмнэлэгт үргэлжлүүлэн эмчилж байсан юм.

Талийгаачийн эхнэр Б.Нандинцэцэг цахим хуудастаа ийн бичжээ.

Тэрбээр “Дэндүү сайхан ханиа араатны гарт алдана гэж зүүдэлсэнгүй явлаа. Гурван үрийнхээ төлөө хичээхээс өөр сонголт надад үлдсэнгүй. Одоо ч итгэхгүй байна, хайрт хань минь. Чамдаа хязгааргүй их хайртай шүү. Бидэнд туслаж, эмчилгээ үзүүлсэн эмнэлгийн хамт олондоо баярлалаа. Найдлагаггүй гэх оношоо хэлсэн ч сайхан сэтгэлээр хүлээж авсан алтан гартай Б.Болдсайхан эмчдээ баярлалаа. Танай эмнэлгийн хамт олон хамгийн мундаг нь. Өнөөдрийг хүртэл үргэлж хамт байж туслаж, дэмжсэн хүн бүхэнд баярлалаа. Хайрт хань минь чи дэндүү их хичээсэн. Чи минь биднийхээ үүрдийн баатар. Амар амгалангийн тайван нойрсдоо. Айл бүр аз жаргалтай, элэг бүтэн байх болтугай” хэмээн бичсэн байна.

Талийгаачийн гэр бүлийнхэнд гүн эмгэнэл илэрхийлж байна.