2022 оны төсвийг батлахдаа нийслэлийн Чингэлтэй дүүргийн тавдугаар хороо буюу олны нэрлэдгээр Тасганы овооны орчимд Шашны соёлыг дэлгэрүүлэх “Богд Зонхова” бурхны хөшөө бүхий цогцолбор байгуулахаар төлөвлөсөн. Уг цогцолборын ажилд ирэх жил нийт 32 тэрбум 490 сая 800 мянган төгрөг тусгасан нь олны анхаарал татаад байна. Тэгвэл тус цогцолборын зураг төслийг “Пи юу ай” ХХК хийж гүйцэтгэжээ.

Энэ талаар “Пи юу ай” ХХК-ийн захирал Б.Баттулгатай холбогдож, тодрууллаа.

-“Богд Зонхова” бурхны хөшөө бүхий цогцолборын зураг төслийг танай компани хийж гүйцэтгэсэн үү?

-Тийм ээ, манай компани хийж гүйцэтгэсэн.

 -Тендер нь албан ёсоор зарлагдаж, “Пи юу ай” ХХК сонгон шалгаруулалтад оролцсон юм уу?

-Оролцолгүй яах вэ. Энэ талаарх мэдээллийг Соёлын яам өгөх болно. Би яг энэ талаар сайн мэдэхгүй. Манай компанийн ерөнхий инженер мэднэ.

 -Хэдэн төгрөгийн төсвөөр зураг төслийг нь хийж гүйцэтгэсэн бэ?

-Энэ тухай хэлэх боломжгүй. Манай компани хууль журмын дагуу эл зураг төслийг хийж гүйцэтгэсэн. Өөр асуудал байхгүй. Энэ талаарх мэдээллийг авмаар байвал Соёлын яамандаа хандаарай.