Цөлжилттэй тэмцэх тухай НҮБ-ын конвенцын талуудын 17 дугаар бага хурал “UNCCD COP17”-гийн хүрээнд Цөлжилттэй тэмцэх тухай НҮБ-ын конвенц “UNCCD”-ийн Нарийн бичгийн дарга нарын газар болон Монголын Бизнесийн Зөвлөл (МБЗ) нар “Business4Land Mongolia Hub” байгуулах тухай Санамж бичигт гарын үсэг зурлаа. Санамж бичигт гарын үсэг зурж, “Business 4Land Mongolia Hub”-ын суурийг тавьсан нь газрын тогтвортой менежмент, нөхөн сэргээлтэд хувийн хэвшлийн оролцоог нэмэгдүүлэх чухал алхам юм.

    Санамж бичгийн хүрээнд Монголын бизнесийн зөвлөл нь Монгол Улс дахь “Business 4Land Hub”-ыг хариуцан ажиллаж, олон улсын “Business 4Land Hub” сүлжээний нэг хэсэг болохын зэрэгцээ хувийн хэвшлийг газрын нөхөн сэргээлт, газрын тогтвортой менежмент, гангийн тэсвэржилт, хөрөнгө оруулалт, технологи, инновацийн боломжуудтай холбох үндэсний платформыг хөгжүүлнэ.

   “Business 4Land” (B4L) нь “UNCCD”-ийн албан ёсны санаачилга бөгөөд газрын доройтлыг бууруулах, доройтсон газрыг нөхөн сэргээх, ганд тэсвэртэй байдлыг бэхжүүлэхэд хувийн хэвшлийн оролцоо, хөрөнгө оруулалтыг нэмэгдүүлэхэд чиглэдэг. Монгол Улсын хувьд газрын доройтол, цөлжилт, ган, бэлчээрийн доройтол нь зөвхөн байгаль орчны асуудал биш бөгөөд ус, хүнсний аюулгүй байдал, мал аж ахуй, уул уурхай, нийлүүлэлтийн сүлжээ болон эдийн засгийн урт хугацааны тогтвортой байдалтай нягт холбоотой юм.