Монгол Улсын Байгаль орчин, уур амьсгалын өөрчлөлтийн сайд Ц.Сандаг-Очир 2026 оны 8 дугаар сарын 26-ны өдөр Бүгд Найрамдах Энэтхэг Улсын Байгаль орчин, ой, уур амьсгалын өөрчлөлтийн сайд Бхупендер Ядав, Бүгд Найрамдах Энэтхэг Улсаас Монгол Улсад суугаа Онц бөгөөд Бүрэн эрхт Элчин сайд Атул Малхари Готсурвэ тэргүүтэй төлөөлөгчидтэй уулзалт хийлээ. Уулзалтын үеэр хоёр талын байгаль орчин, уур амьсгалын өөрчлөлтийн салбарын хамтын ажиллагааг эрчимжүүлэх талаар хэлэлцэв.

    Мөн хүний нөөцийн чадавх бэхжүүлэх чиглэлээр Энэтхэгийн техник эдийн засгийн хамтын ажиллагааны газар (ITEC)-ын монгол мэргэжилтнүүдийг сургаж ирсэн туршлага, уламжлалыг үргэлжлүүлж, хамрах хүрээг өргөжүүлэх талаар санал солилцсон. Монгол Улс нь Бүгд Найрамдах Энэтхэг Улсын санаачилсан Олон улсын том муурны холбоо (IBCA)-д 2025 онд элссэн.

    Энэ хүрээнд цоохор ирвэсийн хамгааллын хүрээнд хамтын ажиллагааг бэхжүүлэхээр харилцан тохиролцлоо. Энэтхэгийн техник эдийн засгийн хамтын ажиллагааны газар /ITEC/ нь Бүгд Найрамдах Энэтхэгийн Засгийн газрын бүрэн санхүүжилттэй, олон улсын чадавх бэхжүүлэх хөтөлбөр юм. 1964 оноос хойш 160 гаруй орны 200 гаруй мянган албан хаагчдыг сургаж, хөгжлийн туршлагаа хуваалцаж ирсэн түүхтэй.