Халдварын тархалт ингэж хурдацтай нэмэгдвэл амьсгалын аппаратууд хүрэлцэхгүй гэдгийг Эмнэлгийн тусламжийн бодлогын хэрэгжилтийг зохицуулах газрын дарга Б.Буянтогтох анхааруулав. 

Тэрбээр “Улсын хэмжээнд 900 гаруй амьсгалын аппарат бий. Өнгөрсөн нэг жилийн хугацаанд Засгийн газраас тодорхой хэмжээний нөөцийг бүрдүүлсэн. Гэсэн ч дээрх аппаратууд зөвхөн коронавирусийн халдварт бус үндсэн тусламж үйлчилгээнд хэрэглэгдэж байгааг ойлгох хэрэгтэй.

Тиймээс яг одоогийнх шиг халдварын тархалт хурдацтай нэмэгдээд явбал дээрх аппаратуудын нөөц эрсдэлтэй болно гэдгийг анхаарах шаардлагатай. Түүнээс гадна, манай улсад уушги орлуулах аппарат ганцхан ширхэг бий. Одоогоор хоёр аппарат захиалсан бөгөөд энэ сард манай улс гурван ширхэг ECMO аппараттай болох төлөвлөгөөтэй байна. ECMO буюу уушги орлуулах аппаратыг ажиллуулахад цаана нь бүхэл бүтэн техникийн баг ажиллаж байдаг. Зөвхөн нэг өвчтөнийг энэ аппаратаар эмчлэхэд гарах зардал нь асар их.

Тодруулбал, коронавируст халдвараар өвчилсөн нэг өвчтөний ECMO аппараттай холбоотойгоор гарч байгаа зардал нь 35 сая орчим төгрөг байгаа юм. Тиймээс бид заавал энэ аппаратад орох хүртлээ тулгах шаардлагагүй. Өөрөөр хэлбэл, иргэдэд өөрсдөд нь өвдөхгүй байж, халдвараас сэргийлэх бүрэн боломж нь бий. Эрүүл мэндийн байгууллагын нөөцийг тултал нь хангах бол зөв стратеги биш. Гол нь бид иргэдтэйгээ нийлж байж л энэ өвчнийг даван туулах ёстой юм. Тиймээс иргэд өөрсдөө халдварт өртөхгүй байхаас гадна хүндрэх эрсдэлтэй бүлгийн хүмүүстээ халдвар тараахгүй байх тал дээр анхаараач гэж хичээнгүйлэн хүсэж байна" гэв.