“Хүмүүс коронавирусийн эсрэг вакцинд эрчимтэй хамрагдвал ирэх тавдугаар сар гэхэд Москва хот хэвийн байдалдаа орж магадгүй” хэмээн Москва хотын дарга Сергей Собянин өнгөрсөн пүрэв гарагт мэдэгджээ. “Одоогоор вакцинд 140 мянга гаруй хүн хамрагдаад буй бөгөөд өнгөрсөн сарын сүүлчээс вакцинжуулалт эхэлсэн нь эхний шинэчлэл боллоо” гэж Сергей Собянин нэмлээ.

Гэвч энэ нь Москва хотын иргэдийн нэг хувийг л вакцинжуулсан тоо бөгөөд кампанит ажлын хүрээг тав дахин нэмж, хурдлуулж болно хэмээн үзэж буй аж.

ОХУ-ын хэмжээнд 1.5 сая коронавирусийн эсрэг вакцины тунг хүргүүлсэн гэж Засгийн газар мэдэгдээд буй ч хараат бус статистикчдын дүн шинжилгээгээр нийт 300 мянга гаруй тунг хүлээлгэж өгсөн мэдээлэл байгаа юм.

Москва хотод он гарснаас хойш өдөрт дунджаар 6400 гаруй  иргэнийг вакцинжуулж байгаа бөгөөд уг тоог 10 мянга руу ойртуулахыг зорьж буй аж. Үүний хүрээнд вакцинжуулах газрын тоог нэмж, ажиллах хуваарийг уртасгаснаар тавдугаар сард Москва хот хэвийн байдалдаа орж магадгүй гэж үзэж байна.