Эдийн засагч Л.Наранбаатар ҮАБЗ-ийн Нарийн бичгийн дарга А.Гансүхийг улсад 55 тэрбум төгрөгийн хохирол учруулж, шамшигдуулсан талаар мэдээллээ. Тэрбээр “Улсад онц их хэмжээний буюу 55 тэрбум төгрөгийн хохирол учруулсан хэргийн нотлох баримтыг танилцуулъя. Энэ хэрэг ҮАБЗ-ийн нарийн бичгийн дарга А.Гансүх, Монгол Улсын Ерөнхийлөгч Х.Баттулга түүний хонгилын шүүгч, прокуроруудтай холбогдож байгаа. Тэд төмөр замын бүтээн байгуулалтаас 55 тэрбум төгрөгийг нуун дарагдуулж, хулгайлсан. Энэ хэрэгт оролцсон шүүгч, прокуроруудыг өнөөдөр зарлана.

Ингээд баримтаа танилцуулъя, Тавантолгой-Гашуунсухайтын бүтээн байгуулалт 276 км төмөр замыг "Энержи Ресурс”  компани нь улсаас нэг ч төгрөг гаргахгүйгээр өөрийн хөрөнгөөр бүтээх санхүүжилтээ босгоод, ТЭЗҮ-ээ батлуулаад тухайн үеийн Зам тээврийн яамтай гэрээ байгуулж, бүтээн байгуулалтын ажлаа эхлүүлэхэд бэлэн болоод байсан. Ингээд туслан гүйцэтгэгч компаниудаараа дамжуулаад 55 тэбум төгрөг хулгайлсан нь мөрдөн шалгах ажиллагааны явцад тодорхойлогдсон. Тухайн үеийн Зам тээврийн сайд Х.Баттулга, дэд сайдаар нь А.Гансүх ажиллаж байсан юм. Х.Баттулга өөрийн ойрын хүмүүсээ эрх мэдэл бүхий албан тушаалуудад  томилсон. Тухайлбал, ЗТЯ-ны Төрийн нарийн бичгийн дарга асан Б.Батзаяа нь Х.Баттулгын жолооч, бие хамгаалагч байсан. Мөн П.Бат-Эрдэнэ  гэх  маш ойрын хүнийг Монголын төмөр замын Гүйцэтгэх захирлаар томилсон. Энэ хүн өнөөдөр гэмт хэргээ шалгуулахгүй Монгол Улсаас зугтчихсан. Интерполоор эрэн сурвалжлагдаад олдохгүй байна.

2015 оны арванхоёрдугаар сарын 29-нд А.Гансүх дээр хэрэг нээсэн. Гэтэл энэ хэргийг 2017 онд шүүгч З.Болдбаатар мөрдөн байцаалт руу буцаасан. Энэ хүн өмгөөлөгч Б.Баасанцогтоос нэг сая төгрөг авсан  баримт дэлгэгдсэн. Тэр бол А.Гансүхийн "гарын хүн" юм. Мөн Улсын дээд шүүхийн шүүгчээр  энэ оны хоёрдугаар сард томилогдсон С.Соёмбо-Эрдэнэ давж заалдах шатны шүүгч байсан. Прокуророос А.Гансүх, Х.Баттулга нарыг улсад хохирол учруулсан нь нотлогдсон тул хэргийг буцаахгүй гэх эсэргүүцэл гарсан. Гэвч С.Соёмбо-Эрдэнэ эсэргүүцлийг хүлээн авалгүй, А.Гансүхийн хэргийг хэрэгсэхгүй болгосон” гэв.