ХУГАЦААНААСАА ӨМНӨ “ХӨӨГДСӨН” САЙДУУД

Ц. АМУНДРА:
Улс төр- Цадиггүй улс төр

2022-09-27, 1807

Ерөнхий сайд Л.Оюун-эрдэнэ Хөдөлмөр, нийгмийн хамгааллын сайд Д.Сарангэрэлийг огцрууллаа. Д.Сарангэрэл нэн ядуу өрхүүдийг “Ул айлууд” гэж томьёолсон нь төрийн сайд хүнд байж болшгүй ёс зүйн дутагдал, нөгөөтээгүүр Үндсэн хуулийг ноцтой зөрчиж ялгаварлан гадуурхсан хэрэг болон хувирч, улмаар давхар дээлээ тайлахаар боллоо. Ингэснээр тэр тамгаа хүлээж аваад 28 дахь хоногтоо огцорсон буюу хамгийн богино “настай” сайд болов.

Тэгвэл 2016 оноос хойш хайхрамжгүй үг, хэнэггүй үйлдлээсээ болж цагаасаа өмнө огцорсон сайдуудыг танилцуулж байна.

“Салбараа удирдаж чадаагүй” гэх үндэслэлээр БСШУС-ын сайд Ж.Батсуурийг огцруулж байв

2017 оны тавдугаар сарын 31-ний УИХ-ын чуулганаар БСШУС-ын сайд Ж.Батсуурийг огцруулах асуудлыг хэлэлцэж байв. Улмаар УИХ-ын чуулганд оролцсон 42 гишүүний 27 нь дэмжсэнээр 62 хувийн саналаар түүнийг чөлөөлсөн байдаг.

Ж.Батсуурийг “Хариуцлага алдсан, хариуцсан салбараа удирдаж чадаагүй” гэх үндэслэлээр огцруулсан. Тухайлбал, ЕБС-иудын Элсэлтийн ерөнхий шалгалтын материал задарсан, Хөгжлийн бэрхшээлтэй хүүхдүүдийн тусгай дунд 29 дүгээр сургуулийн асуудалд сайдын хувиар анхаарал хандуулаагүйгээс болж олон нийтийн шүүмжлэлд өртсөн зэрэг асуудлаар түүнийг чөлөөлсөн.

Харин Ж.Батсуурь “Би хууль зөрчиж, алдаа гаргаагүй. 29, 119 дүгээр сургуулийн асуудал, ЭЕШ-ын материал задарсан зэрэг асуудал бол хариуцлага тооцох эзэнтэй асуудлууд. Үүнд би сайдын хувиар анхаарал хандуулж байсан. Дахин хариуцлагатайгаар хэлэхэд би ямар нэгэн хууль зөрчиж, алдаа гаргаагүй” гэх тайлбар хийж байв.

“Төрийн томчуудад ЖДҮХС-аас зээл олгосон” хэргээр ХХААХҮ-ийн сайд Б.Батзоригийг огцруулж байв

2018 оны арваннэгдүгээр сарын 6-ны УИХ-ын чуулганаар Хүнс, хөдөө аж ахуй, хөнгөн үйлдвэрийн сайд Б.Батзоригийг огцруулах асуудлыг хэлэлцсэн. Улмаар чуулганд оролцсон гишүүдийн 76 хувийн саналаар Б.Батзоригийг сайдаас чөлөөлж байв.

Б.Батзориг нь сайдын эрх мэдлээ ашиглан ЖДҮХС-аас төрийн өндөр албан тушаалтнууд, тэдний хамаарал бүхий этгээдүүдийн компаниудад их хэмжээний зээл олгосон хэрэгт холбогдож, улмаар үүрэгт ажлаасаа чөлөөлөгдөх хүсэлтээ Ерөнхий сайдад гаргаж байсан юм.

“ЖДҮ”-ийн хэргээр Зам, тээврийн хөгжлийн сайд Я.Содбаатарыг огцруулж байв

2019 оны хоёрдугаар сарын 1-ний УИХ-ын чуулганаар Зам, тээврийн хөгжлийн сайд Я.Содбаатарыг огцруулах асуудлыг хэлэлцсэн. Улмаар санал хураалтад 55 гишүүн оролцсоноос 69.1 хувь нь дэмжиж, үүрэгт ажлаас нь чөлөөлж байв.

ЗТХ-ийн сайд Я.Содбаатар эхнэрийнхээ компаниар ЖДҮХС-аас их хэмжээний зээл авсан хэрэг нь илэрч, улмаар сайдаас чөлөөлөгдөх хүсэлтээ тухайн үеийн Ерөнхий сайд У.Хүрэлсүхэд хүргүүлсэн байдаг. Тухайн үед Я.Содбаатар “Миний гэргий ЖДҮХС-аас авсан зээлээ зориулалтын дагуу ашигласан. Өнөөдөр 30 гаруй ажлын байр бий болгож, 20 гаруй хүүхэдтэй асрамжийн газар байгуулан ажиллаж байна. Хэдий Монгол Улсын хуулийг зөрчөөгүй ч гэсэн улстөрчийн хувьд өнөөгийн улс төрийн нөхцөл байдал, Ерөнхий сайд У.Хүрэлсүхийн шударга ёсны тэмцэл зэргийг харгалзан үзэж сайдаас чөлөөлөгдөх хүсэлтээ гаргалаа. Анх удаа ёс зүйн хариуцлага хүлээж байна” хэмээж байлаа.

Харин У.Хүрэлсүх “Дараагийн сайдаар янз бүрийн хэл ам, хэрэгт холбогдсон хүн тавихгүй. ЖДҮ-гийн хэргийг би нэг талаас сайн зүйл боллоо гэж харж байгаа. Я.Содбаатар сайд залуу улстөрч хүний хувьд өндөр ёс зүйн хариуцлага хүлээж байна. ЖДҮХС-аас зээл авсан хүмүүс зээлээ төлж байгаа. Дахин энэ сангуудаас ямар нэгэн алдаатай зүйл гарахгүй гэж би бодож байна” хэмээж байв.

“Засгийн газрынхаа эсрэг ажилласан” үндэслэлээр БСШУС-ын сайд Ц.Цогзолмааг огцруулж байв

2019 оны хоёрдугаар сарын 1-ний УИХ-ын чуулганаар БСШУС-ын сайд Ц.Цогзолмааг огцруулах асуудлыг хэлэлцэж, нийт гишүүдийн 71 хувийн саналаар сайдын суудлаас нь чөлөөлж байв.

Түүнийг Засгийн газрын тухай хуулийн “Засгийн газар танхимын зарчмаар ажиллана”, “Засгийн газар, шийдвэр, мэдээлэл гаргах, албан ёсны байр сууриа илэрхийлэхдээ Ерөнхий сайдын бодлогыг баримтална” гэсэн заалтыг зөрчсөн" хэмээн хариуцлага тооцож, ийнхүү огцруулсан юм.

Эргэн сануулахад, 2018 оны арваннэгдүгээр сарын 19-нд Д.Хаянхярваа тэргүүтэй УИХ-ын 27 гишүүн У.Хүрэлсүхийн Засгийн газрыг огцруулах бичгийг тухайн үеийн УИХ-ын дарга М.Энхболдод хүргүүлж байв. Засгийн газрыг огцруулах бичигт гарын үсэг зурсан 27 гишүүний нэг нь тухайн үеийн давхар дээлтэй сайд нарын нэг БСШУС-ын сайд Ц.Цогзолмаа байсан нь багагүй шуугиан тарьсан. Өөрөөр хэлбэл, Ц.Цогзолмаа өөрийнхөө Засгийн газрыг огцруулахаар гарын үсэг зурсан гэсэн үг юм. Энэ нь “Засгийн газрынхаа эсрэг ажилласан” гэх үндэслэл болсон.

“Утаа гаргаж байгаа айлуудыг дроноор илрүүлнэ” буюу БОАЖ-ын сайд Н.Уртнасан утааны асуудлаар огцров

2022 оны нэгдүгээр сарын 17-ны өдрийн Засгийн газрын хуралдаанаар Байгаль орчин, аялал жуулчлалын сайд Н.Уртнасанг багаар нь буюу дэд сайд, төрийн нарийн бичгийн даргынх нь хамт чөлөөлөхөөр шийдвэрлэж байв.

Ерөнхий сайд Л.Оюун-эрдэнэ БОАЖ-ын сайд Н.Уртнасанг огцруулсан шалтгаан нь Улаанбаатар хотын утаа. Тодруулбал, энэ оны нэгдүгээр сард Улаанбаатар хотын утаа эрс нэмэгдсэн. Гэвч салбар яамнаас болон салбарын сайд нь арга хэмжээ авахгүй байна гэж олон нийт шүүмжлэх болсон. Улмаар утаатай холбоотой асуудлаар Н.Уртнасан олон нийтэд анх удаа мэдэгдэл хийхдээ “Утаа гаргаж байгаа айл өрхүүдийг дроноор илрүүлнэ” гэсэн нь олон нийтийн дунд шүүмжлэл дагуулсан байдаг. Түүнчлэн, Н.Уртнасан удирдаж буй яамныхаа албан хаагчидтай зүй бусаар харьцсан, шинэ санал санаачилга гаргаагүй, төрийн ажлыг гацаасан гэх мэт олон шалтгаан нөлөөлсөн гэдэг.

ХУГАЦААНААСАА ӨМНӨ “ХӨӨГДСӨН” САЙДУУД

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.