Энэ жил төрт улсын минь баяр наадам өргөн дэнжийг хотойтол сайхан болж өндөрлөлөө. Аймаг аймгаас ирсэн хурдан хүлгүүд төрийн их баяр наадамдаа уралдаж нутаг, ус, уяач, унаач хүүхдүүдийнхээ нэрийг цуурайтууллаа. Энэ жил ардын хувьсгалын түүхт 100,101 жилийн баяр наадам давхар болсноороо  онцлог болсон. Тэр ч утгаараа уншигч та бүхэн магнайдаа тоосгүй ирсэн хурдан хүлгүүдийн унаач хүүхдүүдийн яриаг түүвэрлэн хүргэж байна.

 “Намайг Зол-Эрдэнэ гэдэг. Дорнод аймгаас ирж анхны уралдаандаа оролцлоо. Би 12 настай анх удаа улсын уралдаанд түрүүлсэндээ баяртай байна.

Намайг Батхүү гэдэг. Гурав дахь жилдээ хурдан морь унаж байна. Гэхдээ улсын наадамд анх удаа ирж уралдаад аман хүзүүнд хурдаллаа. Би Төв аймгийн Баянхангай сумаас ирсэн айргийн тавд хурдлах сайхан байлаа” гэсэн юм.

Хурдан шүдлэн насны морь унаж айргийн тавд хурдалсан хүлгийн унаач хүү “Уяач ах намайг морины амыг тааруулаад зуулгаад яваарай гэсэн. Би энэ жил улсын баяр наадамд хоёрдох удаагаа хурдан морь унаж байна. Мөн уяач ах надад хандан өнгөний дээр явбал амаа сайн зуулгаад, ташуураа эргүүлээд, гүүглээд байгаарай гэж аминчлан захисан. Өнгөн дээр хурдалж байгаа бол айрагдах магадлал өндөртэй. Тиймээс барианы зурхай руу орох тэр үед морио тарлаж бариандаа орно гэж бодсон. Гэтэл бодсоноор маань болж айргийн тавд багтлаа. Үнэхээр их баяртай байна. Хурлаад ирсний дараа ээж, аав маань уяач руу залгаж баяр хүргээд надтай ярьсан. Хүүгээрээ үнэхээр бахархаж байна” гэсэн. Би том болоод нутаг ус, аав ээжийнхээ нэрийг өндөрт гаргасан уяач болно гэж мөрөөддөг.

Би хязаалан насны морь унах байсан даан ч сэрвээний өндрийн хэмжээсээр орж хасагдсан. Ер нь морь болгон өөрийн гэсэн давхилтай тийм болохоор морь сайн мэдэж, амыг татах үедээ татаж, гийнгоолж, ташуураа эргүүлэх нь зөв. Морины онцлог, хэрхэн давхих талаар уяач ах өдөр болгон зөвлөгөө өгдөг. Түүнийх нь хүчинд өнөөдөр айргийн тавт хурдлалаа. Баяртай байна. Би дахин дөрвөн насны хурдан морь унана заавал айрагт багтана гэж бодож байна. Хурдан хүлгээ унаад айрагт багтана гэдэг гайхамшигтай” гэсэн юм.