Энэ жилийн “Дээлтэй Монгол” наадмыг цар тахлаас шалтгаалан цахим хэлбэрээр нэг сарын хугацаанд зохион байгуулсан. Тэгвэл тус наадмын шилдгүүд өнөөдөр тодорч, шагналаа гардаж авлаа.

Монголчуудын уламжлалт өв соёл, үндэсний хувцасны язгуур хэв шинж, үндэстэн ястны дээл хувцас, эд хэрэглэл, ардын урлагийн биет болон биет бус өвийг дэлхий дахинд сурталчлах, үндэсний хувцсаараа дамжуулан үр хойчдоо түүх, соёл, уламжлалаа өвлүүлэн үлдээх зорилготой “Дээлтэй Монгол” наадмыг анх 2006 онд Монголын Аялал жуулчлалын холбоо, “Монгол костюмс” ХХК-тай хамтран Улаанбаатар хотноо зохион байгуулж байсан. Тэгвэл тус наадам жил ирэх бүр хүрээгээ тэлсээр өдгөө 15 дахь жилдээ зохион байгуулагдаж, өнөөдөр шилдгүүдээ тодруулж байгаа нь энэ юм.

“Дээлтэй Монгол” наадам,  “Dance Chance” монгол хувцастай цахим бүжгийн уралдаанд  Улаанбаатар хотын есөн дүүрэг, 20 аймаг болон Герман, Солонгос, Япон, АНУ, Швед зэрэг зургаан улсаас нийт 5000 гаруй оролцогч оролцож, 200 гаруй бичлэг ирүүлсэн  үндэсний хэмжээний томоохон уралдаан болсон юм.  Цахим бүжгийн уралдааны хамгийн бага нь таван настай оролцогч байсан бол ахмад нь 73 настай өндөр настан байв.

Тэргүүн байрт: Өвөрхангай аймгийн Хүүхдийн ордны дэргэдэх “Ирмүүн” хамтлаг

Дэд байрт: Дорноговь аймгийн Замын-Үүд сумын Говийн уянга борхойн дэг хүүхдийн бүжгийн чуулгын сурагчид

Гуравдугаар байрт: Улаанбаатар хотын Багануур дүүргийн эгч дүүсийн "Хөгжмийн 7 эгшиг" хамтлаг

Тусгай байрт: “Хан Монгол” морин циркийн Солонгос улсын Жэжү хотоос оролцсон уран бүтээлчид Сэлэнгэ аймгийн Мандал сумаас оролцсон М.Маргад нар тус тус шалгарсан юм.

"Дээлтэй монгол" наадмын өнгө төрх, оролцогчдийн хувцаслалтын хэв маяг манай зураглаачийн дуранд ийн буужээ.