Жил болгон шинэ жилийн баярыг эрхгүй догдлон хүлээдэг хүмүүс хөл хорионы улмаас баярын уур амьсгалыг бүрэн мэдэрч чадахгүй байгаа байж мэднэ. Гэрээсээ шинэ жилийн уур амьсгалыг мэдрэхэд туслах есөн аргыг хүргэж байна.

Шинэ жилийн гацуураа засах

Шинэ жилийн уур амьсгалыг мэдрэхийн тулд хамгийн түрүүнд гацуур модоо засах хэрэгтэй. Гацуур мод л байхад шинэ жилийн уур амьсгалыг өгч чаддаг гайхалтай эд билээ. Зарим хүмүүс гацуур модоо чимэглэх мөчийг бүтэн жил хүлээдэг.

Шинэ жилд зориулж хувцас нэхэх

Заавал дэгжин хувцас байх шаардлагагүй, дулаахан нэхсэн ноосон цамц, ороолт, оймс гээд шинэ жилийн уур амьсгал өгөхүйц хэлбэр, өнгөтэйгөөр гэр бүлийн гишүүн бүртээ нэхэж өгч ижилсэж болно. Хэрэв урьд нь юм нэхэж байгаагүй бол яагаад сурч болохгүй гэж.

Шинэ жилийн жигнэмэг барих

Шинэ жилийн жигнэмгийг өөрсдийн өнгө, хэлбэр дүрсээр чимэглэж хийвэл илүү амттай шинэ жил болно шүү дээ.

Шинэ жилийн дуу сонсох

Шинэ жилийн дуу нь уур амьсгал өгдөг нэгэн чухал зүйл билээ. Нэг дуугаа олон сонсохоос илүү шинэ жилийн дууны жагсаалт үүсгэн өдөржин сонсож болно. Мөн өмнө сурч байгаагүй эсвэл дуртай дуугаа сурч болно шүү дээ.

Кино үзэх

Хэд ч үзсэн уйдамгүй шинэ жилийн кинонуудыг одоо л үзэх цаг. Тэндээс цас, шинэ жил, өвлийн, баярын уур амьсгалыг бүрэн өгч чадна.

Дурсамжаараа аялах

Өнгөрсөн жил авсан бэлэг болон зураг, шинэ жилийн дурсамжуудаа эргэн дурсах нь яг л тэр үед очсон мэт сэтгэгдлийг өгнө.

Захидал бичих

Та хүндэлдэг хүмүүстээ чин сэтгэлийн үгтэй захидал бичиж болно. Өөрийн гараар дугтуйгаа хийж, чимэглэн, гарт нь атгуулах цагийг хүлээж болно шүү.

Гэрээ чимэглэх

Цонхон дээрээ зураг зурж, гэрээ гэрлээр чимэгдэж, өөрийн хүссэн орчноо одоо л бүрдүүлэх цаг. Гэрээ чимэглэхдээ гоё үнэртэй лаа асааж болно. 

Сэтгэл шингэсэн бэлэг бэлдэх

Хэн нэгэнд дэлгүүрээс бэлэг авахаас илүү сэтгэл шингэсэн бэлэг хэзээд үнэ цэнэтэй байдаг билээ. Хайртай, дотнын хүндээ гар доорх материалаар шинэ жилийн бэлэг бэлдэж, бэлэглээрэй. Шинэ жилийн уур амьсгал нь сэтгэл санааг өргөж, дархлааг дэмждэг учир энэ жил ч мөн уламжлал болсон шинэ жилийн баярын уур амьсгалыг гэртээ бүрдүүлээрэй.