Цахим сүлжээнд хоол хийж буй бичлэгээрээ олны хайрыг татаад байгаа “Том эгч” буюу О.Сайнсанаатай ярилцлаа.

-Сайн уу. Манай уншигчдад өөрийгөө танилцуулаач?

-Намайг О.Сайнсанаа гэдэг 1в ангид сурдаг. Манай аавыг Одгэрэл гэдэг. Манай ээжийг Булган гэдэг. 

-Хоол хийхийг чамд хэн зааж өгсөн бэ?

-Анх аав ээж хоёр аарц чанахыг зааж өгч байлаа. Таван настай байхдаа шпагетти хийж сурсан.  Би хоол хийж идээд, оноо өгөх дуртай. Ээж хоол хийдэг гадаад охины бичлэг үздэг. Түүнийг нь би ээжтэйгээ үргэлж хамт үздэг байлаа. Тэгээд бид хоёр “Бичлэг хийж эхлэх үү” гэж ярилцаад бичлэг хийж эхэлсэн.

-Чамайг сошиалын үзэгчид “Том эгч” гэдэг нэрээр таньдаг шүү дээ. Яагаад  өөрийнхөө хаягийг “Том эгч” гэж нэрлэсэн бэ?

-Би айлын том хүүхэд. Тэгээд ээж маань миний пэйжийг “Том эгч” гэж нэрлэсэн.

- Ямар хоол хийх дуртай вэ?

-Дуртай хоол шпагетти, цуйван. Харин ээж минь гэдсээр хийсэн  буузанд дуртай.

-Хоол хийж эхлэхэд чамд хэцүү байсан уу?

-Би хутга барихдаа муу болохоор гараа гэмтээж байсан. Тэр нь жаахан хэцүү санагдаж байсан. Намайг дагаж хоол хийж байгаа хүүхдүүдээ “Хутгатай болгоомжтой харьцаарай. Гар хуруугаа гэмтээх вий” гэж анхааруулж, захиж хэлмээр байна.

-Ямар хоол хийж сурахыг хүсэж байгаа вэ?

-Удахгүй миний долоон насны төрсөн өдөр болно. Төрсөн өдрийнхөө бялуугаа өөрөө хийж сурмаар байгаа.

-Нэгдүгээр ангийн сурагч шүү дээ. Хичээл нь хэр байна?

-Цэцэрлэг амархан байсан байна лээ. Гэртээ очоод даалгавар байхгүй. Зурагт үзээд, дүүтэйгээ тоглодог байсан. Хичээл удахгүй гоё болчихно л доо. Гэхдээ цэцэрлэг сургуулиас илүү амар байж гэж бодогдоод байдаг.

-Хичээлийнхэн юу хэцүү байна вэ?

-Өглөө эрт босно. Хичээлээсээ тараад даалгавраа хийнэ. Аав минь математик, харин ээж монгол хэлний хичээлийг зааж өгдөг. Би хэтэрхий олон  хичээл хийхээр ядраад байдаг. Хоёр хичээл хийгээд амраад дараагийн хичээлээ хийдэг.

-Чиний мөрөөдөл юу вэ?

- Чами шиг бичлэг хийдэг хүн болмоор санагддаг. Амттай хоол хийж, олон үзэгчтэй болох мөрөөдөлтэй.

-Баярлалаа.

Х.Анаргүл