ЭМЯ-наас коронавирусийн нөхцөл байдлын талаар мэдээлэл хийлээ. Үүний дараагаар ЭМЯ-ны Олон нийттэй харилцах, тандалт шуурхай удирдлагын хэлтсийн дарга Д.Нарангэрэл сэтгүүлчдийн асуултад хариулав. 

-БНХАУ-аас тээвэрлэж оруулж ирсэн PCR шинжилгээний оношлуур хөлдсөн гэсэн мэдээлэл гарсан. Үүнтэй холбоотойгоор тайлбар, мэдээлэл өгөхгүй юү?

-Коронавирусийн халдварыг тогтоох лабораторийн шинжилгээний шингэн хөлдсөн гэх мэдээлэл бий. Энэ асуудлыг МХЕГ хариуцаж, шалгалт хийж байгаа. Эм, эмнэлгийн хэрэгслийг хуулийн дагуу компаниуд хариуцаж, тээвэрлэдэг.

-Дагалдах онош нь коронавирус байсан хоёр ч иргэн нас барлаа. Энэ хүмүүсийн цогцсыг яах вэ?

-“Ковид-19” халдвараар нас барсан иргэдийг оршуулах тушаалыг Эрүүл мэндийн сайд батлан гаргасан. Үүний дагуу оршуулах үйл ажиллагааг гүйцэтгэнэ.

 -Тусгаарлалтад байгаа иргэдийг 14 хоногоос дээш хугацаагаар тусгаарлаж байгаа юм уу. Тухайлбал, “Амар” зочид буудалд байрлаж байсан иргэдийг одоогоор 19 хоног тусгаарлаад байна?

-Тусгаарлалтын дундаж хугацаа 14 хоног. Халдвар илэрч, дэгдэлт гарвал 28 хоногоор тусгаарлах арга хэмжээ авна.