Эрүүл мэндийн яамнаас коронавируст халдварын нөхцөл байдлын талаарх ээлжит мэдээлэл өгсөн. Өчигдрийн 11:00 цагийн байдлаар 12116 хүнд шинжилгээ хийснээс арван хүнээс коронавирусийн халдвар илэрсэн талаар мэдээлсэн билээ. Тодруулбал, Архангай аймгийн Батцэнгэл сумын халдварын ойрын хавьтлаас халдвар илэрч тус аймагт батлагдсан тохиолдол гурав болсон. Харин Улаанбаатар хотод долоо, Сэлэнгэ, Говьсүмбэр аймагт тус бүр нэг хүнээс халдвар илэрсэн юм. Одоогийн байдлаар Улаанбаатараас гадна Дархан-Уул, Орхон, Говьсүмбэр, Сэлэнгэ, Дорноговь, Архангай зэрэг зургаан аймагт коронавирусийн халдвар батлагдаад байгаа.

Харин өнөөдрийн нөхцөл байдлын талаар ХӨСҮТ-ийн Тандалт судалгааны албаны дарга А.Амбасэлмаа "ХӨСҮТ, ЗӨСҮТ, Дархан, Сэлэнгэ, Орхон аймагт нийтдээ 12015 хүнд шинжилгээ хийхэд, 11 хүнээс халдвар илэрлээ. Тодруулбал, Улаанбаатар хотод зургаан тохиолдол бүртгэгдлээ. Энэ нь сүүлийн халдварын ойрын хавьтал буюу гэр бүл, нэг байрны хүмүүс байсан. Мөн Сэлэнгэ аймагт таван тохиолдол батлагдсан. Ингэснээр Монгол Улсад батлагдсан тохиолдол 812 боллоо. Одоогийн байдлаар Цэргийн төв эмнэлэг, ХӨСҮТ-д биеийн байдал маш хүнд дөрвөн хүн байна" гэлээ.