Эрүүл мэндийн яамнаас коронавируст халдварын нөхцөл байдлын талаарх ээлжит мэдээлэл өгч байна. Өчигдрийн 11:00 цагийн байдлаар 10308 хүнд шинжилгээ хийснээс ДОЛООН хүнээс коронавирусийн халдвар илэрсэн талаар мэдээлсэн билээ. Тодруулбал, Улаанбаатар хотод хоёр, Сэлэнгэ аймагт таван тохиолдол батлагдсан юм. Одоогийн байдлаар Улаанбаатараас гадна Дархан-Уул, Орхон, Говьсүмбэр, Сэлэнгэ, Дорноговь, Архангай зэрэг зургаан аймагт коронавирусийн халдвар батлагдаад байгаа. 

Харин өнөөдрийн нөхцөл байдлын талаар ХӨСҮТ-ийн Тандалт судалгааны албаны дарга А.Амбасэлмаа “Арваннэгдүгээр сарын 30-нд ХӨСҮТ, ЗӨСҮТ, Сэлэнгэ, Дархан, Орхон аймагт нийтдээ 12116 хүнд шинжилгээ хийхэд 10 хүнээс халдвар илэрлээ.Тодруулбал, Архангай аймгийн Батцэнгэл сумын халдварын ойрын хавьтлаас халдвар илэрсэн. Мөн Улаанбаатар хотод долоон тохиолдол бүртгэгдлээ. Ингэснээр Улаанбаатар хотод дотоодын халдвар 84 боллоо. Мөн Сэлэнгэ, Говьсүмбэр аймагт тус бүр нэг хүнээс халдвар илэрсэн. Бусад өвчлөл гарсан аймгуудад халдвар илэрээгүй. Монгол Улсад батлагдсан тохиолдол 801 боллоо. Одоогийн байдлаар Цэргийн төв эмнэлэг, ХӨСҮТ-д маш хүнд зургаан хүн байна" гэлээ.