-Эмчилгээний найман сая төгрөгийн өртөг цаашид ч нэмэгдэж магадгүй-

Эрүүл мэндийн сайд С.Мөнхсайхан "Нэг хүнд найман сая төгрөгийн эмчилгээ хийж байгаа" гэсэн билээ. Коронавирусийн эмчилгээний төлбөрт юу багтдаг талаар ХӨСҮТ-ийн Ерөнхий захирал Д.Нямхүүгээс тодрууллаа.  

-Нэг хүнд найман сая төгрөгийн эмчилгээ хийж байгаа гэсэн үнэн үү. Зардлын задаргааны талаар мэдээлэл өгч болох уу?

-Эмчлүүлж байгаа хүний биеийн онцлогоос шалтгаалж өөр өөр эмчилгээ хийдэг. Бид дэлхийн стандартад нийцсэн эмчилгээг хүн хүний биеийн онцлогт тохируулан хийж, амийг нь аварч байгаа. Тийм учраас эмчилгээний зардлын задаргааны талаар мэдээлэл өгөх нь чухал биш. Энэ талаар тайлбарлах юм бол тийм ч амархан ойлгохгүй шүү дээ. Дунджаар 6.7-8 сая төгрөгийг нэг хүний эмчилгээнд зарцуулж байгаа талаар тооцоо судалгаа гарсан. Манай улс өндөр хөгжилтэй орнууд шиг нарийн тогтоож чадахгүй байгаа. Найман сая гэдэг тоо нь цаашид ч нэмэгдэж магадгүй.

-Эмчилгээний талаар мэдээлэл өгч болох уу. Яг ямар эмчилгээ хийж байгаа юм бэ?

-Эмчилгээнд ашиглаж байгаа эмний нэрийг зарлах хориотой учраас нарийн мэдээлэл өгөх боломжгүй. Хүнд, хөнгөнөөс шалтгаалж өөр эмчилгээ хийнэ. Хөнгөхөн, шинж тэмдэггүй, зовиургүй байгаа хүнд тийм олон төрлийн эм уулгаад байхгүй. Хүнд, хүндэвтэр хүмүүст бас нэг өөр.

-Эмчилгээний зардал болох найман сая төгрөгт эмчийн цалин, ор хоногийн төлбөр, хоол, хамгаалалтын хувцас, эм тариа орсон уу?

-Тиймээ, бүгд багтаж байгаа. Эмийн зардлын тухайд харилцан адилгүй дүнтэй байгаа. Тухайн хүний биеийн онцлогоос шалтгаалан зарим өвчтөнд хэдэн ч төгрөгийн эм зарцуулаж магадгүй. Мөн PCR шинжилгээний урвалж оношлуурын зардлууд багтаж байгаа. Нэг өвчтөнд дунджаар 4-5 удаа PCR шинжилгээ хийж байгаа шүү дээ. Эмч сувилагчдын хамгаалах хэрэгслийн хувцасын төлбөр, нэг өвчтөнд эмч, сувилагч дунджаар өдөрт 2-3 удаа орох бүртээ хамгаалах хэрэгслийн хувцас сольдог. Хүнд хүний биеийн байдлыг үзэх гэж нэг эмч хэдэн ч удаа өрөө рүү нь орохыг таашгүй. Орох бүртээ хамгаалалтын хувцсаа шинээр сольж өмсдөг. Эмчилгээний хоногт эмч, сувилагчийн 4-5 хүний бүрэлдэхүүнтэй баг ажиллах болон тусгаарлагдаж буй зардал орно. Эмчийн цалин, ор хоногийн төлбөр гээд шаардагдаж байгаа бүх төлбөр багтсан гэж ойлгож болно.