Цахим орчинд коронавирусийн халдвар авсан талаараа мэдээлж, иргэдэд сэрэмжлүүлэг өгч байсан Д.Мөнхбат ойрын өдрүүдэд сураг чимээгүй байгаад санаа зовж байгаа олон хүн байгаа аж. Тэрбээр “Энхсаран” сувилалд 22 хоног тусгаарлагдаад, 23 дахь хоног дээрээ халдвартай нь батлагдаж, ХӨСҮТ рүү хүргэгдсэн билээ. Харин Д.Мөнхбатын бие муудаж, хүчилтөрөгчийн аппарат залгуулж байгаа гэнэ. Түүний биеийн байдал ямар байгаа талаар өөрөөс нь чатаар тодруулахад “Миний биеийн байдал хүндэрч, өдөрт 2-3 удаа хүчилтөрөгчийн аппарат залгуулж байгаа. Орой болгон өндөр халуурч, хүчтэй ханиалгаж байна. Гэхдээ эмчилгээ хийлгэж байгаа болохоор өнөөдрөөс арай дээр болж байгаа. Өнгөрсөн өдрүүдэд үнэхээр хүнд байлаа. Толгой өвдөж, сульдаж байгаа болохоор цахимд мэдээлэл өгөөгүй. “Энхсаран” сувиллаас ирсэн хүмүүсийн биеийн байдал ямар байгааг сайн мэдэхгүй. Эмчилгээний хувьд маш сайн байгаа. Хүмүүсийн биеийн онцлогоос шалтгаалж хүнд, хөнгөн тусаж байх шиг байна. Тухайлбал, манай өрөөнд байгаа 50 настай хүнд ямар ч шинж тэмдэг илрээгүй бөгөөд хамар нь ч битүүрдэггүй. Мөн намайг фэйсбүүкт лайв хийсэнтэй холбогдуулан цагдаагийн байгууллагаас нэг хоногийн өмнө залгаж, тодруулсан. Тэрнээс өөрөөр дарамт шахалт үзүүлээгүй гэдгийг миний төлөө санаа зовж байгаа хүмүүст хэлмээр байна” гэлээ.

      Иргэн Д.Мөнхбат эх орондоо эрүүл ирээд, тусгаарлах байрнаас халдвар авсан талаараа мэдэгдсэн билээ. Тэрбээр “Энхсаран” сувиллаас халдвар авсан хүний олонхийг нь халуун усны газраас авсан гэж бодож байгаа. Харин би болон надтай хамт байсан хүн халуун усны газраар үйлчлүүлээгүй, өрөөндөө шүршүүртэй байсан. Бид “Энхсаран” сувиллын ажилчдаас халдвар авсан байх магадлал маш өндөр байгаа юм. Одоо ХӨСҮТ-д “Энхсаран” сувиллын хэд хэдэн ажилтан коронавирусийн халдвар авсан гээд бидэнтэй хамт эмчлүүлж байгаа. Тэгэхээр халдвар халуун усны газарт эхэлж тархаад, тус газрын ажилчид түүнээсээ халдвар аваад, тусгаарлалтад байсан хүмүүст тараасан байх магадлалтай. Би гэхэд л хоол тараадаг хүнээс халдвар авсан байх гэж бодож байгаа” гэх мэдээллийг өгч байсан юм.