"СҮҮЛЧИЙН НҮҮДЭЛЧИД" ХӨРӨГ НОМЫН НЭЭЛТ ИТАЛИ УЛСЫН РОМ ХОТОД БОЛЛОО

2025-11-19, 545

Монголын анхны “Балдорж” шагналт редакц, МСНЭ-ийн “Ган үзэг” шагналт “Оюунлаг эргэлт медиа групп”-ийн дэргэдэх Ergelt.mn мэдээллийн сайтын сэтгүүлчид “Сүүлчийн нүүдэлчид” номоо монгол, англи хэлээр хэвлүүлэн, дэлхийн уншигчдад хүргэж байгаа билээ. Унгар, Чех, Австри, Щейвцарь Улсын уншигчдын гарт хүрээд байгаа тус хөрөг номыг Итали Улсын нийслэл Ром хотод амжилттай нээлээ.

Номын нээлтийн ёслолд Итали Улсын Сапиенза их сургуулийн Дорно дахин түүхийн тэнхимийн профессор Давор Антонуччи, Сапиенза их сургуулийн Хүн ам зүй, антрологи судлалын багш Кристина Жиюфичи, Ватикани Улсын сэтгүүлч Ч.Леонардо Итали Улсын Luiss их сургуулийн оюутан судлаачид оролцлоо. Мөн Монгол Улс Бүгд Найрамдах Итали Улстай дипломат харилцаа тогтоосны 55 жилийн ойн тохиож байгаа цаг үе монголчуудын амьдрал, түүх соёлыг багтаасан сэтгүүл зүйн бүтээлийг уншигч олонд хүргэж байгааг талууд онцлон тэмдэглэлээ.

Номын нээлтэд оролцсон зочид англи хэл дээр хэвлэгдсэн "Сүүлчийн нүүдэлчид" номыг “Эгэл жирийн уншигчид, эрдэмтэн судлаачдын гарын авлага болно” гэдгийг онцолж байлаа.

Итали Улсын Сапиенза их сургуулийн Дорно дахин түүхийн тэнхимийн профессор Давор Антонуччи: Дэлхий дахинд тэр дундаа Итали Улсад монголчуудын эгэл жирийн аж амьдралын талаарх хөрөг ном гарч байгаагүй байх. Эгэл жирийн амьдралыг хөрөг нийтлэл болгон Монголын соёл уламжлалыг таниулж яваа та бүхэнд баяр хүргэж, талархал илэрхийлье. Энэхүү номоор дамжуулан монголчуудын амьдрал, аж байдлыг олон хүн танин мэднэ гэдэгт итгэлтэй байна. Монголчууд бэлчээрийн мал аж ахуйтай учир нүүдэлчдийн соёл, уламжлалтай салшгүй холбоотой байдаг. Сүүлийн үед монголчууд суурин иргэншилд олноороо шилжиж байгаа гэж сонссон. Мөн дэлхий нийтээрээ уур амьсгалын өөрчлөлтөд өртөж байгаа энэ цаг үед байгаль, эх дэлхийгээ авран хамгаалж байгаа нүүдэлчин ард түмний түүхийг хадгалж үлдэж байгаа хүмүүсийн түүхийг номондоо багтаасан гэдгийг сонсоод тун баяртай байна. “Сүүлчийн нүүдэлчид” номыг бүрэн уншиж, сургуулийнхаа номын санд хадгалуулна. Ингэснээр Дорно дахиныг судалдаг оюутан, судлаачдын гарын авлага болно гэдэгт итгэж байна.

Сапиенза их сургуулийн Хүн ам зүй, антропологи судлалын багш Кристина Жиюфичи: Миний хувьд хүн ам зүй, антропологи судлалын багш учраас энэ ном надад маш сонирхолтой санагдаж байна. Монголчууд нүүдэлчин соёл уламжлалаа орчин үеийн соёлтойгоо хэрхэн уялдуулж хөгжүүлж байгааг энэ номноос судлах боломж нээгдэж байна. Мөн монгол хүний онцлогийг шинжлэх ухааны талаас судлахад энэ ном асар их тус нэмэр болно гэдэгт итгэж байна. Монголчуудын талаар Монгол Улсын талаар би мэдэх хэдий ч энэ номноос шинэ амьдрал, шинэ соёл уламжлалыг танин мэдэх гэж байгаадаа талархаж байна. Номоо нээхээр манай Итали Улсад хүрэлцэн ирж байгаа та бүхэнд баярлалаа. Баяр хүргэж, өндөр амжилт хүсье.

Ватиканы сэтгүүлч Ч.Леонорда: Би Ромын пап лам Франциск 2023 онд Монгол Улсад айлчлал хийхэд хэвлэлийн багт багтаж очсон сэтгүүлчдийн нэг. Өргөн уудам нутагтай Монгол Улс маш их таалагдсан. Нүүдэлчин соёл уламжлалынхаа талаар бичсэн номоо нээж байгаа монголчуудтай дахин уулзсандаа баяртай байна.

"Сүүлчийннүүдэлчид" хөрөг ном нь баларч хуучраагүй нүүдэлчин ахуй, өв уламжлалыг орчин цагийн соёл иргэншилтэй хослуулан амьдарч буй монголчуудын гайхамшигт амьдралын онцгой төлөөлөл болох эх орныхоо эзэнгүй талд 40 жил давс олборлон, нөхөрлөж байгаа дөрвөн хөгшний байгалиа хамгаалах тэмцэл, нөхөрлөлийн гэгээн түүх, хоёр километрийн цаадахыг түвэггүй хардаг монгол хүн, хүн, амьтдын мөрийг алдалгүй хэлж чаддаг мөрч эмэгтэйн улсынхаа аюулгүй байдлыг хамгаалалцсан домогт ажиллагаанууд, дэлхийд гайхагдсан уурхайн ордуудыг нээн илрүүлэгч, хосгүй урлаач, буйдхан суурингийн сургуулиас ирээдүйд дэлхийн суутан болох мөрөөдөлтэй бяцхан сурагчид тэргүүтэй ховор амьдралын эздийн баримтаас сэдэвлэсэн хөрөг бүтээлийн чуулган юм.

"СҮҮЛЧИЙН НҮҮДЭЛЧИД" ХӨРӨГ НОМЫН НЭЭЛТ ИТАЛИ УЛСЫН РОМ ХОТОД БОЛЛОО

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 0

Шинэ мэдээ

Нийтлэлчид