Цагийн менежмент нь ажил,амьдралын үйл явцаа зөв хувиарлах, зохион байгуулах, хийх зүйлсээ эрэмбэлэхийг хэлдэг. Товчхондоо цагаа зөв хувиарлах чадвар юм. Ухаалаг, зөв цагийн менежмент хийж чадвал ажил хэцүү хүнд санагдахгүй, өөртөө ч сэтгэл зүйн дарамт учруулахгүй, бага цагт их зүйл амжуулж чадна. Ингэснээр бухимдал бага, өдөр бүрийг урсгалаар өнгөрөөхгүй, ажилдаа дарагдахгүй, амьдралынхаа бүх түвшинд анхаарал хандуулна. Тэгвэл цаг төлөвлөлтөө сайжруулахад тань туслах аргаас хуваалцаж байна.

 ЦАГАА ЮУНД ЗАРЦУУЛЖ БАЙГААГАА АНЗААРАХ

      Энэ алхмыг аль болох хялбар, ойлгомжтой байлгахын тулд дэвтэр гаргаад өдөрт цагаа зарцуулж байгаа зүйлсээ жагсаа. Ажилдаа 10 цаг, гэр бүлдээ 1-2 цаг, зурагт үзэ, фэйсбүүк ухахад нийт 2-3 цагийг, унтахад 8-9 цагийг зарцуулдаг бол өмнөө маш том, улаан асуултын тэмдэг байна гэж ойлгох хэрэгтэй. Өөр бусад зүйлд огт цаг зарцуулдаггүй юм биш биз, нэг зүйлдээ л хэт их төвлөрөөд байгаа юм биш биз. Үр дүнгүй зүйлд цагаа үрээд байгаа юм биш биз. Үүнийг уншигч та нэг бодоод үзээрэй.

ХЭРЭГТЭЙ ЦАГТАА ҮГҮЙ ГЭЖ ХЭЛЖ ЧАДДАГ БАЙХ

      Хүнд туслах мэдээж сайхан л даа. Гэхдээ үнэхээр чиний цаг завыг үрэх, төлөвлөгөөнд чинь саад болох зүйлд бол зоригтойгоор үгүй гэж хэлж сурах хэрэгтэй. “Буруугаар бодчихно” гэж бүү эмээгээрэй. Чиний цаг алтнаас үнэтэй учраас чи хэрэгтэй, чухал, сэтгэл ханамж өгөх зүйлдээ зарцуулах бүрэн эрхтэй.

 МЭДЭЭЖ, ТӨЛӨВЛӨ

 Ямар ч төлөвлөгөөгүйгээр ажлаа амжуулах тухай бодож яваа юм биш биз. Хэрэв тийм бол яг одоо тэмдэглэлийн дэвтэр, утасны мемогоо гаргаад өглөө, өдөр, орой, хийх зүйлсээ жагсаа, дараалалд оруул, мартахгүйн тулд тэмдэглэ.

 ЭМХ ЦЭГЦТЭЙ БАЙХ

     АНУ-д хийсэн судалгаагаар хүн нэг сард 2,5 өдрийг хайсан зүйлээ олоход зарцуулдаг гэсэн үр дүн гарчээ. Эмх замбараагүй байдал нь цаг хугацаанаас гадна хүний төвлөрөлтөд сөрөг нөлөөтэй байдаг тул өөрийн эргэн тойрны зүйлсийг эмх цэгцтэй байлгахад анхаарах хэрэгтэй.

ПОМОДОРО АРГА

   Та 20–25 минут л юунд ч сатаарахгүйгээр нэг ажилдаа төвлөрөх хэрэгтэй. Энэ үедээ өөрт сануулах зорилгоор 25 минутын сэрүүлгийг тавиарай. Цаг дуусмагц багадаа 5 минут ихдээ 15 минутын амралт аваад дараагийнхаа 25 минут руу орно. Төвлөрөх хугацаа бага юм шиг хэдий ч маш үр өгөөжтэй цагийн менежментийн арга юм.

Санамж: 5 болон 10 минутын амралт авах үедээ аль болох гар утсаа оролдохгүй байх, харин бага зэргийн хөдөлгөөн хийх, дуртай цайгаа оочингоо намуухан ая сонсохыг зөвлөж байна.

ӨӨРИЙН БҮТЭЭМЖТЭЙ ЦАГИЙГ ОЛЖ МЭДЭХ

  Хүн бүрийн бүтээмжтэй цаг харилцан адилгүй. Зарим хүн орой суухаараа ажилдаа төвлөрч чаддаг бол нөгөө хэсэг нь өглөө эрт илүү төвлөрч, их ажлыг гараасаа гаргадаг. Бүтээмжтэй цагаа олох нь хамгийн төвөгтэй гэсэн ажлаа үр дүнтэйгээр дуусгахад тусалдаг. 

ХАМГИЙН ЧУХЛЫГ ТҮРҮҮЛЖ ХИЙ

      Чухлаа түрүүлж хийхгүй бол цаг заваа зарцуулж хийсэн бусад зүйлс чинь үнэ цэнгүй ч болж мэдэх учраас хамгийн чухал, хамгийн яаралтай, цаг хугацааны хувьд нэн түрүүнд хийх шаадлагатай зүйлээ заавал төлөвлөгөөнийхөө эхэнд тусга. 12 цагт даргадаа ажлын тайлангаа өгөх ёстой бол үүн дээрээ эхлээд ажилла, чухал төсөл дээр ажиллаж байгаа бол бусад ажлаа хийх цагийг хойш нь зоогоод төслийн ажилдаа анхаарал хандуул. Өдөрт олон ажлыг амжуулахыг хүсдэг байлаа ч нэн чухал нэг ажлаа чанартай гүйцэтгэсэн байхад тэр өдрийг чи нэлээд үр бүтээлтэй өнгөрүүлчихлээ л гэсэн үг шүү. Тиймээс яаралтай, чухал ажлаа нэн түрүүнд барьж авдаг байгаарай.

Жишээ болгон Айжана оюутны цагийн хувиартай танилцъя. 

АЙЖАНА ОЮУТНЫ ЦАГАА ТӨЛӨВЛӨХ ТАЛААР ХУВААЛЦАХ ЗӨВЛӨГӨӨ:

1. Өөртөө зориулах цагаа хамгаалаарай Энэ цагтаа өөрийгөө цэнэглэх юу ч хийж болно

2. Утсаа үзэж, сошиалаар “аялах” цагаа хязгаарлах үүднээс тодорхой цаг товлож, тэр цагтаа л утасныхаа мессеж, инстаграм тик токоо шалга. Үгүй бол өдрийн турш анхаарал чинь сарниж, бүрэн гүйцэд суралцахад саад болно.

3. Тогтсон хэв маяг, дэглэмтэй байж, тэрийгээ барь. Ялангуяа энэ хорио цээртэй, өдөр хоногоо ялгахаа байсан үед бүр чухал. 

ЦАГ ТӨЛӨВЛӨЛТДӨӨ ТЭНЦВЭРИЙГ ХАДГАЛАХ ЗАРЧМЫГ БАРИМТЛАХ

Та өөрийн зорилго, төлөвлөгөөгөө тодорхойлохдоо ажил,амьдралын тэнцвэр зарчмын дөрвөн чухал зүйлийн алийг нь ч орхигдуулж болохгүй.

1. Бие махбодь,эрүүл мэндийн асуудал

2. Соёл боловсролын асуудал

3. Гэр бүл, нийгмийн асуудал

4. Ажил хөдөлмөртэй холбоотой асуудал

БЭЛТГЭСЭН Б.СУВДАНЦЭЦЭГ