Хэнтий аймгийн Норовлин сумын харьяат Н гэх эмэгтэй алдарт эхийн хоёрдугаар одонгоо зургадугаар сарын 1-нд гардаж авах байжээ. Түүн рүү сумынх нь Засаг даргын Тамгын газрын ажилтан өмнөх өдөр нь залгаж, “Та зургадугаар сарын 1-ний 10:00 цагт ЗДТГ-т ирж, алдарт эхийн одонгоо гардаж авах тул бэлэн байна уу” гэжээ.

Тухайн өдөр Н гэх эмэгтэй аймгийнхаа төвд ажилтай явж байсан аж. Тэрбээр ЗДТГ-ын ажилтан ярьсан даруй  сум руугаа гарсан байна. Харин одонгоо авахаар очиход нь “Одон цөөн тоогоор ирсэн тул танд өгөх боломжгүй” гэх хариу өгч, хоосон буцжээ. 

Энэ талаар Н-ийн нөхөр Ц “Эхнэрт минь зургадугаар сарын 1-нд алдарт эхийн хоёрдугаар одонгоо аваарай” гэж хэлсэн байна лээ. Тухайн үед Хэнтий аймагт чухал ажилтай явж байсан бөөн баяр хөөр ажлаа орхиод сумандаа ирсэн. Гэтэл ЗДТГ-ын удирдлагууд “Одон цөөхөн ирсэн тул танд хүрсэнгүй” гэж хэлсэн байна лээ. Хамаатан садан, ах, дүү нар, хөрш найз нөхөд маань баяр хүргэхээр бэлэг бариад иртэл хоосон тарлаа. Сумын удирдлага болон хариуцлага алдсан ЗДТГ-ын ажилтан нарт гомдолтой байна” гэв.

Энэ талаар Норовлин сумын ЗДТГ-ын даргаас тодруулахад “Сумын Иргэдийн төлөөлөгчдийн хурлаас Ерөнхийлөгчийн Тамгын газар руу одон медаль авах хүмүүсийн тодорхойлтыг бүрдүүлж явуулдаг. ИТХ-ын даргаас тодруулах нь зүйтэй” гэв.

      Харин тус сумын ИТХ-ын дарга н.Бат-Ирээдүйгээс энэ талаар тодруулахад “Хоёрдугаар сард алдарт эхийн одон авах 12 эхийн материалыг аймгийн ЗДТГ руу хүргүүлсэн. Нэг эхийн материал шаардлага хангаагүй тул буцаж ирсэн. Үлдсэн 11 эхийн бичиг баримтыг аймгийн ЗДТГ-аас Ерөнхийлөгчийн Тамгын газар руу хүргүүлсэн юм билээ. 10 эхэд олгох одон тавдугаар сарын сүүлчээр аймгийн ЗДТГ-т ирсэн гэсэн. Би тавдугаар сарын 31-нд аймаг орж алдарт эхийн одонгуудыг хүлээж авсан. Очиход нэг хүнийх нь ирээгүй, 10 хүнийх ирсэн байсан. Тэгээд нарийн бичиг рүүгээ залгаад “Н гэх эмэгтэйгийнх ирээгүй байна. Ар гэр рүү залгаж хэлээрэй” гэж хэлсэн. Одон гардуулахаас хэдэн цагийн өмнө Н рүү залгаж, “Таны одон ирээгүй байна” гэдгийг хэлсэн юм билээ. Гэтэл энэ хүмүүс ЗДТГ-т ирээд, хоосон буцсан юм шиг юм ярьж, бичиж байна. Алдарт эхийн одонгийн үнэмлэх дээр авах хүнийх нь нэр бичээстэй ирдэг. Манайхаас нэрийг нь өөрчилж, засах боломжгүй. Ерөнхийлөгчийн Тамгын газраас “Яагаад энэ хүний одон медалийг явуулаагүй” талаар лавлах гээд байж байна” гэлээ.