• Өнөөдөр 2024-03-29

ЦЕГ: "Олон нийтийн газар хоол идэж байгаад торгуулсан" гэх бодит бус мэдээлэл тараасан иргэнийг зөрчлийн хуулиар шалгаж байна

2021-05-15,   550

              Өчигдөр О.Мөнхтөр гэх иргэн Сүхбаатарын талбайн дэргэдэх цэцэрлэгт түргэн хоол идэж байгаад 10 мянган төгрөгөөр торгуулсан тухайгаа цахим хаягтаа нийтэлж, түүнийг нь уншсан иргэд зөрчлийн тухай хууль болон цагдаагийн байгууллагын хандлагыг эсэргүүцэж эхлэсэн. Тэгвэл өнөөдөр ЦЕГ-ын Хэвлэл мэдээллийн төвөөс уг мэдээлэл нь "худал мэдээлэл" гэх тайлбар гаргажээ. Түүнчлэн зөрчил үйлдсэнээ олон нийтэд зөвхөн хоол идэж байгаад торгуулсан мэт ойлгуулсан учир зөрчлийн хуулиар үргэлжлүүлэн шалгаж байгаа гэжээ. 

Тодруулбал, өчигдөр иргэн О.Мөнхтөр "Олон нийтийн газар хоол идсэн гэж зөрчлийн хуулиар торгуулав. Өдөржин гадуур бичиг баримт бүрдүүлж явахдаа хүргэлтээр хоол захиалах гэхээр банканд эсвэл нэг цэгийн үйлчилгээ гэх мэт олон нийтийн газар үйлчлүүлж байсан болохоор тодорхой хаяггүй байв. Машинаа азын сугалаа шиг болсон зогсоол олж тавиад хотын төв дотроо алхаж ажлаа амжуулах зуур CU орж хотдог гоймон аваад ус хийлгэж гараад барьж явсаар талбайн урд сааданд хүний хөлөөс хол сууж идэв өдөржин алхсан болхоор хөлөө амрааж гутлаа тайлаад сууж байтал цагдаа ирж олон нийтийн газар хоол идсэн гэж торгоно гэв сануулаад өнгөрөөж болохгүй юм уу гэхэд за тэгвэл ядаж нэгийг нь торгоё гээд 10000төгрөгөөр торгов. Торгуулийн хуудас нь хог хаясан гэж бичсэн байх юм. Савхны гадна талын хуруун чинээ цаасыг ч хүртэл хаяхгүй гэж кармаалсан энэ байна гээд гаргаад үзүүлтэл авч хэлэлцэхгүй л торгууль бичээд 10к авлаа даа. Гудамжинд хог хаях битгий хэл цонхоороо тамхины иш хаядаггүй хүндээ уул нь. Машин минь өөрөө хогийнн сав шиг л явдаг. Гэрээсээ өглөө 7 цагт гарахдаа өдөр идэх хоолоо аваад гарвал халуун машинд өдөржин байхаар муудах байх гээд хоол аваагүй гарсан. Өдөр нь гэртээ ирээд хоол идэе гэхээр хаа байсан яармагт ирээд буцаад гарвал түгжрэлд өдрийг дуусгах болхоор машинаа төвд орхиод төв хэсгээр алхаж л явсан шд уул нь. Сааданд тамхи татаагүй, согтууруулах ундаа хэрэглээгүй зүгээр түргэн хоол идсэн гэж торгуулж үзлээ. Машиндаа л хогоо авч явдагдаа. Миний машин өөрөө хогийн сав л гэсэн үг. Өө тийн би 2 дахь тунгаа хийлгээд 14 хоносон болно" хэмээн бичсэнд нь 2500 орчим хүн хариу үйлдэл үзүүлжээ. 

Тэгвэл ЦЕГ-ын Хэвлэл мэдээллийн төвөөс "СБД-ийн 6 дугаар хороо Сүхбаатарын талбайн урд талын цэцэрлэгт хүрээлэнд 2021.05.14-ний өдөр 17.00 цаг орчим иргэн Э.Б гэгч нь олон нийтийн газарт хог хаясан үйлдэл гаргасан тул Зөрчлийн тухай хуулийн 5.1 дүгээр зүйлийн 1 дэх хэсэгт заасны дагуу 10 нэгжээр торгох шийтгэл оногдуулсан байна. Олон нийтийн цахим сүлжээнд мэдээлэл оруулсан иргэн О.М гэгч нь зөрчил үйлдсэн иргэнтэй хамт байсан бөгөөд хоол идсэн гэх үндэслэлээр цагдаагийн алба хаагч иргэнд шийтгэл хүлээлгэсэн гэх үндэслэлгүй ташаа мэдээлэл түгээсэн болох нь шалгалтын явцад тогтоогдсон. Хуулиар хүлээсэн үүргээ биелүүлж, зөрчил үйлдсэн этгээдэд хуульд заасан шийтгэл оногдуулсныг олон нийтэд бодит бус байдлаар мэдээлэл түгээсэн тухайн иргэнийг Зөрчил шалган шийдвэрлэх тухай хуульд заасны дагуу үргэлжлүүлэн шалгаж байгаа болно" гэх мэдэгдэл гаргажээ.


ЦЕГ: "Олон нийтийн газар хоол идэж байгаад торгуулсан" гэх бодит бус мэдээлэл тараасан иргэнийг зөрчлийн хуулиар шалгаж байна
АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 0
Шинэ мэдээ
Нийтлэлчид
Монгол Улс, Улаанбаатар хот, Сүхбаатар дүүрэг, VIII хороо, "Ардын эрх"-ийн байр, Гуравдугаар давхарт Эргэлт.мн редакц
7509-1188