Төр, нийгмийн зүтгэлтэн С.Зориг агсны амийг хөнөөсөн  хэрэгт буруутгагдан, ял эдэлж буй иргэн Б.Содномдаржаа, Т.Чимгээ нарыг өнөөдөр батлан даалтад гаргахаар болсон. Б.Содномдаржаагийн ээж Б.Жавзмаа хүүгээ хорих ангиас тосохоор иржээ. Тэрбээр “С.Зориг агсны хэргээр олон хүнийг хэлмэгдүүллээ. Сүүлд миний хүүг хэлмэгдүүлж, долоон жил хорилоо. Энэ хугацаанд эх хүний хувьд сэтгэл өвдөж, хүүгээ гаргаж авахаар цаг тутамд хөөцөлдөж байлаа. Баригдсан өдрөөс эхэлж л хөөцөлдсөн. Үнэн гэдэг сайхан юм. Үнэн болоод л өнөөдөр хүүг минь суллаж байна. Ерөнхий сайд Л.Оюун-Эрдэнэ, Хууль зүйн сайд Х.Нямбаатар, ЗГХЭГ-ын дарга Ц.Нямдорж нарт их баярлалаа.

      Ц.Нямдорж миний хүүгийн төлөө зургаан жил хөөцөлдсөн. Коронавирусээс үүдэн хүүтэйгээ уулзаагүй удаж байлаа. Хаяа нэг л утсаар ярьдаг. Тиймээс өнөөдөр “Хүүгээ гарчих болов уу” гэж горьдоод хүрээд ирсэн. Тус хэрэгт Э.Бат-Үүлийг холбоотой гэж ард түмэн ч мэднэ, би ч тэгж боддог" гэлээ.