Тавдугаар сарын 2-ны өдөр Багахангай дүүргийн хоёрдугаар хороонд байрлах айлын хашаанд байлдааны зориулалттай бөмбөг байна гэх мэдээллийн дагуу тус дүүргийн Цагдаагийн хэлтэс хамгаалалтад авч, аюулгүй байдлыг хангаж ажиллаа. Улмаар тавдугаар сарын 11-ний өдөр Зэвсэгт хүчний 084 дүгээр ангийн зургаан хүний бүрэлдэхүүнтэй устгалын бүлэг айлын хашаанаас бөмбөгийг тээвэрлэн, суурин газраас таван км зайд гарган, устгах ажлыг зохион байгуулж, аюулгүй болгосон байна.

Тус бөмбөг нь "ПАБ-150" загварын байлдааны зориулалттай нисэх онгоцны бөмбөг бөгөөд бөмбөгний хөнөөлийн радиус нь нэг км буюу хоёрдугаар хорооны хэсгийг бүрэн устгах чадвартай байсан байна.

Цаашид байлдааны зориулалттай тэсэрч, дэлбэрэх зүйл болон байрлалын талаарх мэдээ, мэдээллийг холбогдох байгууллагад мэдэгдэж өөрийн болон иргэдийн амь нас, аюулгүй байдлыг хангах талаар хүн бүхэн анхаарч сэрэмжтэй байхыг Багахангай дүүргийн цагдаагийн хэлтэсээс анхааруулав.