Монгол Улсын шинэ Засгийн газрын 100 хоногийн ажлын тайланг Ерөнхий сайд Л.Оюун-Эрдэнэ өнөөдөр танилцууллаа. Тэрбээр "Эрүүл мэндээ хамгаалж, эдийн засгаа сэргээх 10 их наядын цогц төлөвлөгөөнд багтсан ажлын байр хадгалах зээлийн хүртээмжийг сайжруулахын тулд нэг их наяд төгрөг нэмэхээр банкуудтай ярьж байгаа. Банкуудтай холбоотой асуудлыг долоо хоног бүр хэлэлцэж байна. Гурван хувийн хүүтэй зээлийг хүртээмжтэй байлгах нь тийм ч амар биш. Өнгөрсөн 30 жилийн хугацаанд арилжааны банкнаас гурван хувийн хүүтэй зээл олгож байгаагүй. Тэгэхээр 17 хувийн хүүг шууд гурван хувь руу оруулах нь банкны салбарт ч том эрсдэл. Гэхдээ энэ ажил банкны салбарт том реформыг эхлүүлж байгаа гэж найдаж байна. Хадгаламжийн хүүг шат дараатай бууруулах ажил эхэлж байгаа. Тиймээс банкны салбарын том реформыг хөндөж байгаа тул иргэд үүнд хүлээцтэй хандах нь зөв. Мэдээж зээл бол тодорхой шалгууртай, зах зээлийн зарчмаараа явна. Энэ бол халамж биш, тэтгэлэг биш. Зээлийн хүүг бууруулах шинэчлэлийн ажил гэдэг агуулгаар нь ойлгох нь чухал юм" гэлээ.