Хөгжлийн бэрхшээлтэй иргэдийн хөгжлийн ерөнхий газрын мэргэжилтэн М.Чулуун-Эрдэнэ Хөдөлмөр нийгмийн хамгааллын сайд А.Ариунзаяад өчигдөр өргөдөл гаргалаа. Тэрбээр “Хөгжлийн бэрхшээлтэй иргэдийн ерөнхий газрын нэр бүхий долоон удирдлага 2020 оны тавдугаар сарын 15-ны өдөр ажлын цагаар албаны машинтай зугаалга зохион байгуулсан. Энэ нь Төрийн албаны тухай хуулийн 37.1.1 Монгол Улсын Үндсэн хууль, бусад хуулийг хүндэтгэж, сахин биелүүлэх заалтыг зөрчиж байна. Төрийн албан хаагчийн гол үүрэг хууль сахин биелүүлэх.

  Мөн 2019 онд хөгжлийн бэрхшээлтэй хүүхдүүдийн дунд тэмцээн зохион байгуулж, түрүүлсэн хүүхдэд “IT ZONE” дэлгүүрээс үнэ бүхий нөүтбүүк, принтер олгох байсан хэдий ч Хөгжлийн бэрхшээлтэй иргэдийн хөгжлийн ерөнхий газрын Тамгын газрын дарга У.Хурцэцэг дээрх зүйлсийг хувьдаа завшсан. Түүнчлэн Б.Хурцэцэг нь “Honda” маркийн хуучин автомашиныг 150 сая, “Sonata-8” автомашиныг 100 сая төгрөгөөр тус тус худалдаж авсан. Өнөөдрийн зах зээлийн ханшаар “Sonata-8” маркын автомашин 100 сая төгрөг хүрэх үү. Төрөөс мөнгө олгохгүй биш, олгож байна. Гэвч энэ мэт нэр бүхий мэргэжилтнүүд хувьдаа завшиж байна. Тиймээс би Хөдөлмөр нийгмийн хамгааллын сайд А.Ариунзаяад өргөдөл гаргаж байна. Эдгээр нэр бүхий албан тушаалтныг ажлаас нь чөлөөлж, цаашид төрийн албанд ажиллах боломжгүй болгох тушаал гаргахыг өргөдөлдөө тусгасан” гэлээ.