Булган аймаг, Сэлэнгэ сумын төвөөс зүүн хойд зүгт 120 км-т байх Атар багийн Сөртийн-Адаг гэдэг газарт энэ сарын 6-нд ойн түймэр гарсан.

Ойн түймрийг унтраахаар тус аймгийн Онцгой байдлын газрын Хангал сумын Хялганат тосгон дахь Гал түймэр унтраах, аврах 50 дугаар анги, Цагдаагийн хэсэг, Хилийн 0286, 0243 дугаар ангийн алба хаагчид, “Зэд Хантай Бүтээлийн” нурууны дархан цаазат газрын хамгаалалтын захиргаанаас нийт 30 хүн, дөрвөн автомашин, есөн морьтойгоор ажилласан. Тэгвэл өчигдөр буюу тавдугаар сарын 7-ны 15:00 цагт ойн түймрийг цурамд оруулж, бүрэн унтраасан байна. Урьдчилсан байдлаар түймрйин улмаас 30 га талбай шатжээ.

Ойн түймэр гарсан энэхүү газар нь борог өвстэй, унанги мод ихтэй, уулын оройгоор цастай байна гэж Онцгой байдлын ерөнхий газраас мэдээллээ.