Монгол Улсын Ерөнхий сайд Л.Оюун-Эрдэнэ Зүүнбаян, Гашуунсухайтын төмөр замын бүтээн байгуулах ажилтай өнөөдөр танилцах үеэрээ Тавантолгойн нүүрс угаах үйлдвэр болон Зэс баяжуулах үйлдвэр байгуулах ажил эхэлж буйг онцоллоо. 

"Тавантолгой" ХХК өөрийн хөрөнгийн эх үүсвэрээр Нүүрс угаах үйлдвэр барихаар болсон бөгөөд өнөөдөр ажил нь эхэлж буйг Ерөнхий сайд тэмдэглэв. Харин Зэсийн баяжуулах үйлвэрийг Засгийн газрын тогтоолоор "Эрдэнэт" ТӨҮГ-ыг түшиглэн байгуулахаар болсон юм. Ингэснээр, манай улс зөвхөн байгалийн баялгаа олборлоод гаргах биш, нэмүү өртөг шингээж экспортолж эдийн засагт онцгой үр өгөөжтэйг тодотголоо. 

Гашуунсухайтын төмөр зам ирэх оны долдугаар сарын 1-нд ашиглалтад орохоор санхүүжилтийн график гарчээ. Тиймээс ашигт малтмалаа боловсруулаад зөвхөн автомашинаар бус, төмөр замаар тээвэрлэж экспортын гарцаа нэмэгдүүлэх бололцоотойг дурдлаа. Мөн дараа нь Зүүнбаянгийн төмөр зам ашиглалтад орно. Тус замын ойролцоо ашиглалтад оруулахаар төлөвлөж буй 23 стратегийн орд газар буйг онцоллоо. Ерөнхий сайдын энэ удаагийн албан томилолтоор тэдгээр ордыг эдийн засгийн эргэлтэд оруулах асуудлыг шийдвэрлэж байгаа ач холбоглотойг тэмдэглэв. 

Тэрбээр "Засгийн газраас олборлолтоос баяжуулах, нэмүү өртөг шингээх бодлого зарласан. Өмнөх өдрүүдэд түүхэн үйл явдлууд болж өнгөрлөө. Тухайлбал, Тавантолгойд нүүрс угаах үйлдвэх байгуулах шийдвэр гаргасан нь өнөөдөр ажлаа эхлүүлэхээр болж байна. Энэ үйлдвэр 2023 онд ашиглалтад орох бөгөөд нүүрсээ зөвхөн түүхийгээр биш, нэмүү өртөг шингээж экспортлох боломж нээгдэнэ. Одоогоор Тавантолгогоос 60 ам.доллароор гарч буй нүүрс дэд бүтцэд холбогдож, Гашуунсухайт боомтод ирдэг болсноор, 100 ам.доллар болж өсөхөөр байна. Эрдэнэтийн Зэс баяжуулах үйлдвэрийн ТЭЗҮ гарсан. Алт, зэс, төмрийн хүдэр гээд байгалийн баялгаа нэмүү өртөг шингээж, зөвхөн автомашинаар биш, галт тэргээр экспортод гаргах бодлого хэрэгжиж эхэлж байгаад баяртай байна" гэлээ.