Дундговь аймгийн нийт нутгаар хүчтэй цасан болон шороон шуурга шуурч, олон мал элс, цасанд дарагджээ. Тодруулбал, Дундговь аймгийн Говь-угтаал суманд 17.0 мм, Цагаандэлгэр суманд 6.0 мм, Гурвансайхан, Дэрэн  суманд 0.2 мм зузаан цас орж, Говь-Угтаал, Гурвансайхан, Өндөршил, Өлзийт сумын нутгаар салхины хүч 28 м/с, бусад сумдад 16-24 м/с хүрч, цасан болон шороон шуурга шуурчээ.

Шороон болон цасан шуурганы улмаас малчдын малын хашаа хороо, мал элс, цасанд дарагдсан байна. Одоогоор дээрх сумын малчид болон сумын төрийн албан хаагчид хамтран элс, цасанд дарагдсан малыг гаргах ажлыг зохион байгуулж байгаа аж. Бид Дундговь аймгийн Онцгой комиссоос элс, цасанд хэдий хэмжээний мал дарагдаж, ямар хохирол гарсан талаар тодруулахад "Одоогоор хэдийн хэмжээний хохирол учраад байгаад тодорхой хэлэх боломжгүй байна. Сум бүрд хохирлыг тодорхойлох ажлыг зохион байгуулж байна" гэлээ.