УИХ-ын чуулганы өнөөдрийн хуралдаанаар олон хүүхэдтэй өрх толгойлсон эх, эцэгт тэтгэмж олгох тухай хуульд нэмэлт, өөрчлөлт оруулах тухай хуулийн төслийг хэлэлцэж, эцэслэн баталлаа. Тус хуулийн зарим заалт Үндсэн хуулийн холбогдох заалтыг зөрчсөн гэх дүгнэлт гарсан. Тодруулбал, уг хуулиар 0-3 хүртэлх насны хүүхдээ асарч байгаа зөвхөн төрүүлсэн эхэд хүүхэд асарсны тэтгэмж олгохоор хуульчилсан нь агуулгын хувьд ижил нөхцөлд хүүхдээ асарч байгаа эцэг дээрх тэтгэмж авах боломжийг хязгаарлаж, хүүхдээ асарч байгаа эцэг, эхэд хүйсээс шалтгаалсан ялгамжтай байдлыг бий болгосон гэж Үндсэн хуулийн цэц үзсэн юм.

Тэгвэл уг хуульд нэмэлт, өөрчлөлт оруулснаар 0-3 настай хүүхдээ гэртээ асарч буй аав нар сар бүр тэтгэмж авах боломж бүрдлээ. Хөдөлмөр, нийгмийн хамгааллын сайд А.Ариунзаяа "Энэ хуулийн өөрчлөлттэй холбоотойгоор төсвийн тодотгол хийхгүй. Өрх толгойлсон эцэг, эхийн тэтгэмжийг 7200 хүн авдаг. Харин 0-3 насны хүүхдээ гэртээ асардаг эхчүүд одоогийн байдлаар Цалинтай ээж хөтөлбөрт хамрагдаж байна. Үүн дээр 0-3 насны хүүхдээ гэртээ асарч байгаа аав нар нэмэгдэж байгаа. Ингэснээр жилд 20000 орчим эцэг тэтгэмж авах боломжтой" гэлээ.