Цар тахлын нөхцөл байдалтай холбоотойгоор ерөнхий боловсролын сургуулийн сурагчдын зуны амралтыг энэ сард эхлүүлэхээр болжээ. Тодруулбал, ЕБС-ийн I-III ангийн сурагчид ирэх даваа гарагаас буюу тавдугаар сарын 10-наас эхлэн амрах юм байна. Харин дунд болон ахлах ангийн сурагчид тавдугаар сарын 14-нөөс амрах аж. Төгсөх ангийн буюу арванхоёрдугаар ангийн сурагчид зуны амралт эхэлснээс хойш ЭЕШ-ын давтлагад хамрагдах юм байна.

Цар тахлын улмаас сурагчид 2019-2020 оны хичээлийн жилд буюу ноднин үзэх ёстой нийт хичээлийнхээ 45 орчим хувийг зайнаас судалсан байдаг. Харин энэ хичээлийн жилд 60-68 хувийг теле болон цахим байдлаар хичээллэсэн байна. Энэ хичээлийн жилд цэцэрлэгт 247040 хүүхэд, ЕБС-д 680837 хүүхэд суралцаж байгаа аж. Зайн сургалт урт хугацаагаар үргэлжлэх нь сурагчдын эрүүл мэндэд сөргөөр нөлөөлж, ялгаатай байдлыг нэмэгдүүлэх, багш сургчдын өдрийн ачааллыг нэмэгдүүлэх зэрэг олон сөрөг үр дагавартай байгаа учир амралтыг наашлуулахаар хэд хэдэн хувилбар боловсруулжээ. Үүнд:

1. Боловсруулсан саналуудынхаа хүрээнд эцэг эх, асран хамгаалагчид, багш, сургуулийн удирдлагуудын дунд санал асуулга явуулахад багш нарын 72 хувь, эцэг эхчүүдийн 70 хувь нь амралтыг наашлуулах болоод намар эрт хичээллэж эхлэх саналыг дэмжсэн байна. Мөн мэргэжлийн байгууллагууд болон ажил хариуцагчидтай зөвлөсөн болно.

2. Цэцэрлэг болон 1-3 дугаар ангийн сурагчдыг энэ сарын 7-ны өдөр хичээллүүлээд амраах бол 4-12 дугаар ангийн сурагчид ирэх баасан гарагт хичээллээд амарна.

Есдүгээр анги төгсөөд МСҮТ-д элсэх хүсэлтэй сурагчид хичээлийн агуулгаа үргэлжлүүлэн теле байдлаар судлах боломжтой.

Харин 12 дугаар ангийн сурагчид 14-ний өдрөөс эхлэн давтлагад хамрагдана. Давтлага танхимаар эсвэл зайнаас байх уу гэдгийг УОК эцсийн байдлаар шийдвэрлэнэ. Багш нарын амралтыг зургадугаар сарын 1-нд эхлүүлэхээр төлөвлөж байна.

3. Амралт эхлэх шийдвэртэй холбоотойгоор улсын болон анги дэвших шалгалтыг өнгөрсөн жилийн нэгэн адилаар цуцалж байна. Гэхдээ шалгалт авахгүй ч дүн гаргана. Дүнг гаргахдаа танхимаар хичээллэсэн хугацааны амжилт, зайнаас хичээллэсэн үеийн идэвх, бусад оролцоо зэргийг харгалзаж үзэх юм. Дүн гаргах аргачлалыг сургууль, багш нарт хүргэж байна.

4. Элсэлтийн ерөнхий шалгалтын зохион байгуулалттай холбоотой мэдээллийг ирэх долоо хоногт зарлана. 5. Эрт амарч байгаа учир ирэх намар наймдугаар сарын 15-ны өдрөөс хичээлийг эхлүүлэх ажлыг одооноос зохион байгуулна.