Дулааны улирал наашилж зам засвар, тохижилтын ажлыг эрчимжүүлж эхэлсэн. Энэ жилийн хувьд цар тахлаас үүдэн зарим бүтээн байгуулалтын ажил хойшилжээ.

Үүнтэй холбогдуулан Зам тээврийн яамны хэвлэлийн ажилтан Ц.Галбадрахаас зарим зүйлийг тодрууллаа. Тэрбээр “Хөл хориог үл харгалзан зам засварын ажлууд хэвийн явж байна. Энэ жилийн хувьд том, жижиг олон замын ажил хийхээр төлөвлөсөн. Үүнээс  Завхан аймгийн Солонготой давааны 67 км, Дархан-Уул аймгийн зам хамгийн том бүтээн байгуулалт болно. Дархан-Уул аймгийн замыг “Азийн хөгжлийн банк”, “Европын хөгжлийн банк” хамтарч хийж байгаа. “Азийн хөгжлийн банк” хуучин хоёр урсгалтай замыг сэргээн засаад, ирэх намар гэхэд хүлээлгэж өгнө. “Европын хөгжлийн банк” нэмж хоёр урсгалтай зам хийж байна. Тэгээд дөрвөн урсгалтай болж байгаа юм. Тэр ажил нь одоо л дөнгөж эхэлж байна шүү дээ. Тиймээс Дархан-Уул аймгийн замыг хэзээ хүлээлгэж өгөхийг мэдэхгүй байна” гэлээ.