Зэвсэгт хүчний Жанжин штабын дарга, хошууч генерал Д.Ганзориг мягмар гарагт Хүний эрхийн үндэсний комиссын даргын үүргийг түр орлон гүйцэтгэгч, гишүүн Ж.Хунан нарын албаны хүмүүсийг хүлээн авч уулзаж, хоёр байгууллагын харилцаа, хамтын ажиллагааг тодотголоо. Уулзалтын эхэнд хошууч генерал Д.Ганзориг "Хоёр байгууллага олон жилийн хугацаанд хамтран ажиллаж, хүний эрхийн чиглэлд нэлээдгүй ажил өрнүүлсэн байдаг. Цаашид ч гэсэн та бүхний заавар, зөвлөмжийг цэргийн албаны онцлогтой нийцүүлэн хэрэгжүүлсээр байх болно” гэлээ. 

Түүнчлэн Хүний эрхийн үндэсний комиссын даргын үүргийг түр орлон гүйцэтгэгч Ж.Хунан: “Цэргийн алба хаагчид албан тушаалын зэрэглэл, цолны эрэмбээр захирах, захирагдах ёсыг чанд сахиж, дүрмийн дагуу албан үүргээ гүйцэтгэдэг онцлогтой. Үүнийг нь бид ойлгож байна. Хүний эрхийн үндэсний комисс, Зэвсэгт хүчний Жанжин штабтай хамтран 2018 онд Зэвсэгт хүчний нэгтгэл, ангиудад хүний эрхийн сургагч багш бэлтгэсэн, энэ тогтолцоог цаашид хэвшүүлж, сургагч багшийн тоог нэмэгдүүлэх шаардлагатай байна" хэмээн онцлов.