Энэтхэгийн 60 иргэн Дорноговь аймгийн Алтанширээт суманд газрын тос боловсруулах бүтээн байгуулалтын ажилд оролцохоор ирсэн хэмээн УОК-ын Шуурхай штабаас мэдээлсэн билээ. Энэтхэгээс ирсэн 60 иргэний 19-өөс нь халдвар илрээд байна. Халдвар илэрсэн 19 хүний 18 нь Дорноговь аймагт тусгаарлагдаж байгаа юм. Харин  Дорноговь аймагт тусгаарлагдаж байгаа Энэтхэгийн иргэд халдвар хамгааллын дэглэм баримтлаагүй, гудамж талбайд зорчиж байгаа талаар мэдээлэл гараад байгаа билээ.

Энэ талаар Дорноговь аймгийн Эрүүл мэндийн газрын дарга Г.Энхцэцэг “Тусгай үүргийн нислэгээр ирсэн энэтхэгчүүдийг жуулчны баазад тусгаарлаж байгаа. Одоогийн байдлаар манай аймагт ирсэн Энэтхэгийн 18 иргэнээс халдвар илэрсэн. Тэд тусгаарлалтын дэглэм мөрдөж, жуулчны баазад байгаа. Дэглэм зөрчиж, гудамж талбайгаар яваагүй. Нэгдсэн эмнэлгийн эмч болон хариу урвалын багийнхан хянаж байгаа” гэв.

Харин тус аймгийн мэдээллийн ажилтнаас энэ талаар тодруулахад “Өнгөрсөн намар Алтанширээ суманд ирж, бүтээн байгуулалтын ажилд оролцож байсан энэтхэгчүүдийн зураг байна лээ. Тэд тусгаарлалтын хугацаагаа дуусгаад, ажиллаж байх үеийн зураг нь. Энэ сарын 26-нд ирсэн энэтхэгчүүдийг аймгийн төвөөс зайтай байрлах жуулчны баазад тусгаарласан. Гудамж талбайд чөлөөтэй зорчиж байна гэдэг нь худал мэдээлэл” гэв.