Ховд аймгийн Залуу багш нарын холбоо дүрмийнхээ дагуу ээлжит хурлаа хийж, багш нарынхаа хөгжлийн төлөө түүчээлэн ажиллах шинэ бүтэц бүрэлдэхүүнийг сонгосон байна. Улмаар цаашид хийх ажлын төлөвлөгөөг энэ оны дөрөвдүгээр сарын 26-ны өдөр цахим хэлбэрээр товч танилцууллаа. Тэд эхний ээлжинд "Үндэсний бичигтэн байгууллага" шалгаруулах уралдаан зохион байгуулахаар болжээ.

Энэхүү уралдааны зорилго нь монгол бичгийг түгээн дэлгэрүүлэх, энэ чиглэлд сургалт, судалгаа, хэрэглээний орчин бүрдүүлэх, орон нутгийн багш, ажилтнуудын монгол бичгийн мэдлэг, чадварыг дээшлүүлэхэд чиглэх юм.

Ховд аймагт үйл ажиллагаа явуулдаг боловсролын салбарын бүх байгууллагын дунд зохион байгуулах тус уралдаанд монгол хэл, бичгээс бусад чиглэлийн багш, ажилтнууд оролцох боломжтой.   

Тус уралдаан сургууль, сургуулийн өмнөх боловсрол гэсэн хоёр ангиллаар явагдана. Уралдаанд оролцогчид хичээнгүй бичих, минутын уншлага, кирилл бичгээс монгол бичигт хөрвүүлэх, гэрийн даалгавар гэсэн дөрвөн төрлөөр өрсөлдөх аж. Ингэхдээ уралдаанд оролцогчид тусгайлан өгсөн даалгаврыг уншиж, бичиж, цээжлэх бэлтгэл хийнэ. Монгол хэл, бичгийн анги төгсөөд хөрвөж сурсан багш нар сургууль, цэцэрлэгийн баг хамт олноо бэлтгэх, дэмжих хэлбэрээр оролцоно. Мөн оролцогчид багаараа даалгавар гүйцэтгэх ба багийн таван гишүүн үндэсний хувцас өмсөх зэрэг хэд хэдэн зохион байгуулалт хийхээр төлөвлөжээ.

Тус уралдааны шалгаруулалтын үйл ажиллагаа ирэх есдүгээр сарын 20-нд болно гэж албаны эх сурвалж мэдээллээ. Үүний дараа багш нарын дунд "Өөрийгөө хөгжүүлэгч шилдгийн шилдэг залуу багш" шалгаруулах уралдаан зохион байгуулахаар төлөвлөжээ. Тус уралдааны үйл ажиллагаатай холбоотой мэдээллийг “Ховд аймгийн Залуу багш нарын холбоо” гэх цахим хуудсаар дамжуулан авах боломжтой