УИХ-ын гишүүн Х.Ганхуяг олон нийтийн дунд “Дунд голоо тохижуулъя” 3D зургийн уралдаан зарлажээ. Уг уралдаан таван сая төгрөгийн шагналын сантай бөгөөд нийслэлийн Хан-Уул, Баянгол дүүргийн нутаг дэвсгэрийг зааглан хотын төвөөр урсах Дунд голыг иргэдийн амралт чөлөөт цагаа өнгөрүүлэх ая тохитой орчин болгох зорилготой аж. Уралдаанд оролцогчид Энхтайваны гүүрнээс Алтай хотхоны гүүр хүртэлх Дунд голыг дагасан нийт гурван км орчим явган хүний зам, далан, голын орчныг тохижуулах зураг төсөл боловсруулах юм байна.

“Дунд голыг түшиглэн иргэд, олон нийтэд зориулсан амралт зугаалга, чөлөөт цагаа зөв боловсон өнгөрүүлэх цэцэрлэгт хүрээлэн, дугуйн зам, хүүхэд, залуус, ахмад настнуудад зориулсан тоглоомын талбай, биеийн тамир чийрэгжүүлэлтийн талбайг цогцоор нь шийдвэрлэсэн байх шаардлагатай.  Уралдаанд мэргэжлийн дизайнерууд болон тухайн мэргэжлээр суралцаж буй оюутан залуус, сонирхогчид оролцох боломжтой. Шагналын сан нь таван сая төгрөг бөгөөд ганц ялагч тодруулна”  хэмээн УИХ-ын гишүүн Х.Ганхуяг цахим хуудаснаа мэдээлжээ.

Шүүгчид эхний шатны сонгон шалгаруулалтыг тавдугаар сарын 16-нд хийж, эцсийн шатанд тэнцсэн бүтээлүүдийг оролцогчдод мэдээлнэ. Эцсийн шалгаруулалтыг УИХ-ын гишүүн Х.Ганхуяг пэйж хуудсаар дамжуулж танилцуулах ба олон нийтээс хамгийн олон санал авсан бүтээлийг тэргүүн байранд шалгаруулах юм байна.