Орон нутгийн төрийн бус байгууллагуудыг чадавхжуулах, шилжин суурьшигчдад мэдээлэл, үйлчилгээ өгөх хөтөлбөрийн нээлтийн үйл ажиллагаа цахимаар амжилттай боллоо. НҮБ-ын Шилжилт Хөдөлгөөний Байгууллагаас санаачлан Монгол улсын Засгийн Газрын Хэрэг Эрхлэх Газар болон Хөдөлмөр, Нийгмийн Хамгааллын Яам, Нийгмийн Дэвшил Эмэгтэйчүүд Хөдөлгөөн ТББ хамтран хэрэгжүүлж буй уг хөтөлбөр нийт 11 аймгийн 17 ТББ-уудын оролцоотой хэрэгжиж байна. Хөтөлбөрийн гол зорилго нь иргэдэд шаардлагатай мэдээлэл, үйлчилгээг өгснөөр шилжин суурьшигчдын нийгэм, эдийн засгийн байдал сайжрах юм.

XНXЯ-ны дэд сайд С. Зулпхар “шилжилт xөдөлгөөний асуудал өөрөө тулгамдсан асуудал тул зөв оновчтой удирдаx, зоxицуулаx шаардлагатай. Орон нутгийн ТББ-аар дамжин хэрэгжүүлэx эдгээр төслүүд нь хамтын ажиллагааг бий болгоод зогсоxгүй бодит үр дүнг гаргаx, шилжилт xөдөлгөөнийг зөв зоxицуулаxад бодитой хувь нэмэр оруулна” хэмээн хөтөлбөрийн нээлтийн үеэр хэлсэн юм.

Монгол улсын дотоодын шилжих хөдөлгөөн 2000 оноос эрчимжиж эхэлсэн ба шилжилт хөдөлгөөний дийлэнх нь хөдөө орон нутгаас Улаанбаатар хот, төв суурин газрууд буюу аймгийн төв, сумдыг чиглэсэн төлөвтэй байна. Иргэд ихэвчлэн амьдралаа сайжруулах, сурч боловсрол эзэмшихээр шилжих хөдөлгөөн хийдэг ч тэднийг чиглүүлэх, дэм болох мэдээ мэдээлэл, үйлчилгээ дутмаг байдаг нь судалгаагаар харагджээ.

Хэдий орон нутгийн ТББ-ууд шилжин суурьшигчдад зориулсан үйл ажиллагаа хэрэгжүүлдэг байсан ч энэ удаад уг хөтөлбөрт сонгогдсон ТББ-ууд чадавх бэхжүүлэх сургалтад хамрагдан, шилжилт хөдөлгөөний тухай болон шилжин суурьшигчдын сэтгэлзүйн онцлог, хэрэгцээт мэдээлэл, үйлчилгээний тухай цогц мэдээллийг мэргэжлийн байгууллагуудаас суралцсанаараа онцлогтой болж байна.

Хөтөлбөрт хамрагдаж буй 17 ТББ-ууд нь шилжилт хөдөлгөөн өндөртэй аймгуудаас доторхой шалгууруудын дагуу өнгөрсөн 9 сард сонгогдсон ба нийт 12.4 сая төгрөгийн 48 төрлийн үйл ажиллагаа хэрэгжүүлэхээр төлөвлөөд байна. Зарим ТББ-ууд иргэдэд шилжилт хөдөлгөөнтэй холбоотой хуулийн зөвлөгөө, мэдээлэл өгөх, тэднийг ажилд ороход нь зуучлах, шаардлагатай зөвлөмжөөр хангах зэрэг үйлчилгээ багтсан ба хөл хорио, нөлөөллөөс үүдэлтэй эмзэг байдлыг бууруулах үйл ажиллагаанууд мөн тусгагджээ.

НҮБ-ын Шилжилт Хөдөлгөөний Байгууллагын хөтөлбөрийн менежер Виктор Лутенко хөтөлбөрөөс хүлээгдэж буй үр дүнгийн тухайд  “Бидний зүгээс иргэдэд хүрэх үйлчилгээний чанарыг чухалчилж байна. Өөрөөр хэлбэл иргэдийн амьдрал бодитоор сайжирсан, бодит үр дүнг хүлээж байна” гэсэн юм.

Энэхүү хөтөлбөр нь Монгол дахь Дотоодын Шилжилт Хөдөлгөөнийг Ойлгож, Удирдах нь төслийн хүрээнд хэрэгжиж байгаа ба төслийн санхүүжүүлэгчээр Швейцарын Хөгжлийн Агентлаг ажиллаж байна. Хөтөлбөрийн тухайд ШХА-ийн Хамтын ажиллагааны дэд захирал, Нэгдүгээр нарийн бичгийн дарга Бэнya Мэйер-Биш “эдгээр төслүүдээр дамжуулан иргэний нийгмийн байгууллагын идэвxтэй үйл ажиллагааг дэмжиxийн зэрэгцээ хамгийн чуxал нь xүмүүсийн амьдралыг өөрчлөx бодит боломж гарч байгаа”-г онцоллоо.

Хөтөлбөр нийт 6 сар үргэлжлэх ба хөтөлбөрийн төгсгөлд нийт зургаан мянган шилжин суурьшигчид амьдралд нь нэн хэрэгцээт үйлчилгээг авсан байх ба 60 мянган иргэд шилжилт хөдөлгөөний тухай тодорхой мэдээлэл авсан байхаар төлөвлөжээ.  Мөн хөтөлбөрийн дүнд нийт 17 ТББ-ууд нэгдэн шилжилт хөдөлгөөний аймаг дамнасан сүлжээ бий болгох ба энэхүү сүлжээ нь  аймгийн захиргаатай нягт хамтран ажиллаж, шилжин суурьшигчид руу чиглэсэн тогтвортой үйлчилгээ бий болгох юм байна.

Харин хөтөлбөрийг зохион байгуулж буй НҮБ-ын Шилжилт Хөдөлгөөний Байгууллага болон Нийгмийн Дэвшил Эмэгтэйчүүд Хөдөлгөөний зүгээр ТББ-ууд гишүүдэд үргэлжлүүлэн чадавх бэхжүүлэх болон мэргэжлийн зөвлөгөө, сургалтуудыг үргэлжлүүлэн хүргэсээр байна гэлээ.