УИХ-ын гишүүн Н.Учрал хүнд өвчинтэй нүүр тулж, Улсын II төв эмнэлгийн эрчимт эмчилгээний тасагт хэвтэн эмчлүүлж байгаад БНСУ-ыг зорьсон. Тус улсад удаан хугацаанд эмчилгээ хийлгэсний эцэст хөл дээрээ босож, эх орондоо ирээд удаагүй байгаа. Тэрбээр эх орондоо ирмэгцээ 30 гаруй килограмм жин хассан зургаа цахим хуудсандаа оруулж, "20 настай Темон иргэн ирлээ" хэмээж, эрүүл саруул болсноо зарласан билээ. Тэгвэл УИХ-ын гишүүн Н.Учрал өнөөдөр “КАРАНТИН-14” шоу нэвтрүүлэгт дүрст дуудлагаар холбогдож, ард түмэнд мэндчилгээ дэвшүүлж, өнгөрсөн хугацаанд өөрийг нь эрүүл саруул болгохын төлөө бүх ур чадвараа дайчилсан эрүүл мэндийн салбарынхан, өөрт нь санаа зовж, чилээж байсан бүх хүмүүст талархал илэрхийллээ. 

 

УИХ-ын гишүүн Н.Учрал “Элэг нэгт монгол ахан дүүс та бүхнийхээ энэ өдрийн амар амгаланг айлтган мэндчилье. Миний хувьд үнэхээр баяртай байна. Өглөөний нарыг монгол ахан дүүс та бүхэнтэйгээ угтаж, амьдрах сайхныг мэдэрч, та бүхэндээ мэндчилгээ дэвшүүлж суух мөч тохиож байгаад үнэхээр сэтгэл өндөр байна. Миний хувьд маш хүнд өдрүүдийг өнгөрүүллээ.  Энэ хугацаанд би хүн гэдэг амьтан бол амьдрахын сайхныг амьдарч байхдаа мэддэггүй мөртлөө амьдралд маш их хайртай, өвчин зовлонд сөхрөхгүй гэж хичээдэг юм байна гэдгийг ойлголоо. Тийм учраас хүн амьдарч байх хугацаандаа хайр түгээж, бие биедээ хүндэтгэлтэй хандаж, амьдралын сайхныг мэдрэх нь хамгийн том утга учир, аз жаргал юм байна гэдгийг мэдэрлээ. Хүн амьд явна гэдэг л хамгийн том аз жаргал. Ямар ч их мөнгө, эд хөрөнгөөр худалдаж авч чадахгүй зүйл бол эрүүл мэнд гэдгийг энэ дашрамд хэлэхийг хүсэж байна. 

 

Би ээжийгээ, аавыгаа, ойр дотнын хүмүүстээ ямар бэлэг өгвөл хамгийн их баярлах вэ гэж их бодсон. Хамгийн том бэлэг бол хайртай хүмүүсийнхээ сэтгэл санааг амар амгалан, тайван байлгах л юм байна. Би өнгөрсөн саруудад ээжийнхээ, аавынхаа, хайртай ханийнхаа, хүүхдийнхээ сэтгэлийг амар амгалан байлгаж чадсангүй дээ гэдэгтээ маш их шаналж байсан. Миний цаашид амьдралдаа баримтлах зарчим бол амьдралын мөч бүрийг хайрлаж, хайртай хүмүүсийнхээ сэтгэлийг амар амгалан байлгаж, эрүүл саруул, элэг бүтэн амьдрахын төлөө л хичээнэ. Материаллаг эд зүйлсийг аваад үхэж чадахгүйгээс хойш түмэн олныхоо дунд нэр төртэй байж, хайр талархлыг нь хүлээж амьдрах ёстой. Та бүхэнтэйгээ мэндчилээд сууж байх энэ сайхан боломжийг олгосон Улсын хоёрдугаар төв эмнэлгийн хамт олонд маш их баярлалаа. Та бүхний миний төлөө гаргасан сэтгэлийг зүтгэлээр хариулахын тулд цаашид хичээж ажиллах болно. Мөн миний төлөө сэтгэлээ чилээсэн, миний төлөө сүүн цацлаа өргөж байсан олон эхчүүдийн сайхан сэтгэлийн хариуд би  эрүүл саруул байж, эхлүүлсэн олон ажлуудаа дуусгаж, эх орондоо элэг бүтэн амьдрах бололцоог бүрдүүлэхийн төлөө ажиллах болно. Та бүхэндээ хайртай шүү” гэсэн юм.