Засгийн газраас хөл хорио тогтоосон өдрөөс эхлэн уран бүтээлчид хамтран “Карантин 14” телевизийн контентийг үзэгчдэд хүргэж эхэлсэн. Тус контентийг ЗГХЭГ, Соёлын яамнаас нэг тэрбум гаруй төгрөгөөр санхүүжүүлсэн гэх мэдээлэл цахим орчинд цацагдаад байна.  Энэ мэдээллийн дагуу Соёлын яамнаас тодруулахад “Манай яам санхүү, мөнгөтэй нь холбоогүй. Зөвхөн өөрийн харьяа уран бүтээлчидтэй холбож өгсөн” гэх тайлбар өглөө. Мөн Сангийн яамнаас уг контентд санхүүжилт олгоогүй гэдгээ мэдэгдсэн юм.

Тус контентийн санаачлагч “ETV” телевизийн захирал Т.Ганзулаас тодруулахад “Манай контент улсаас нэг ч төгрөг аваагүй. Телевизийнхэн нийлж санаачлаад, зохион байгуулсан юм. Ивээн тэтгэгчийн хувьд “MCS”, “Modern nomads”, “Хас” банк зэрэг М.Батбилэгийн нэвтрүүлгийн үеэр дурдаж буй байгууллагууд ивээн тэтгэсэн. “MCS”-ийн “Asem village”-д тайзаа засаж, контентоо хийж байгаа. “Sky resort” дотроо майхан бариад тусгаарлагдсан. Тусгаарлагдсан юм чинь мэдээж өдрийн гурван хоол идэх болно. Үүнийг “Modern nomads”, “MCS” дааж байгаа, унаа тэрэг бүгд телевизийн зөвшөөрөлтэй машин байх жишээний.  Бидний шилэн дансыг шүүж үзэх юм бол улсаас санхүүжүүлсэн нэг ч төгрөг байхгүй. “Боловсрол” телевизийн захирал Н.Мэндбаяр бид хоёр шууд дамжуулалтын, тоног төхөөрөмж, ажилчидаа гаргаж байна. Манай телевизээс гэхэд 15 хүн шууд дамжуулалт дээр ажиллаж байна.

Харин бид УОК, НОК, ЭМЯ-аас “Эх сурвалжаа манай нэвтрүүлэгт оруулж өгөөчээ” гэж хүсэлт явуулсан. Өөрөөр Засгийн газартай холбогдсон ямар ч зүйл байхгүй.

Жүжигчдийн хувьд телевизтэй хамтарч ажилладаг уран бүтээлчид. Киноны рекламыг гаргаж, эргээд бидний нэвтрүүлэгт орох, арга хэмжээ хөтлөх зэргээр хамтарч ажилладаг. Тэр жүжигчдээсээ сонгож оролцуулсан. Тиймээс жүжигчдэд мөнгө өгөөгүй. Мөн хүмүүс “Hero” энтертайментийн захирал Б.Баатарыг зохион байгуулсан гэж ойлгоод байна. Б.Баатар найруулагч бидний хүсэлтээр зөвлөхөөр л ажиллаж байгаа юм” гэлээ.