ЗГХЭГ-ын дарга Ц.Нямдорж замын хөдөлгөөний аюулгүй байдлын дүрэм зөрчиж буй бичлэгийг иргэн ил болгосон билээ. Ц.Нямдорж нь 0052 УБҮ дугаартай “Lexus” загварын машин жолоодож явахдаа явган зорчигч руу шавхай үсэргэн, шаардуулж байж уучлалт гуйж байгааг бичлэгт харуулсан юм. Замын хөдөлгөөнд оролцохдоо суудлын бүсээ зүүгээгүй ЗГХЭГ-ын дарга Ц.Нямдоржийг хуулийн дагуу 20 мянган төгрөгөөр торгожээ.

Түүний жолоодож явсан 0052 УБҮ дугаартай “Lexus” автомашин 2016-2021 оны хугацаанд 32 удаа зөрчил гаргаж, торгуулж байжээ. Нийт 32 удаагийн торгуулиас ердөө хоёрыг нь төлж, барагдуулсан байна. Тодруулбал, 2021 оны дөрөвдүгээр сарын 19-нд гаргасан зөрчилд ногдуулсан 20 мянган төгрөг, 2018 оны есдүгээр сарын 27-нд гаргасан зөрчилд ногдуулсан 400 мянган төгрөгийн торгуулийг зөрчил гаргасан өдөртөө төлж, барагдуулжээ. Харин үлдсэн 30 торгууль буюу 752 мянган төгрөгийн торгуулийг төлж барагдуулаагүй байна. Өөрөөр хэлбэл, ЗГХЭГ-ын дарга Ц.Нямдоржийн унаж, замын хөдөлгөөнд оролцсон “Lexus” загварын автомашин 32 удаагийн зөрчил гаргаж, нийт 1.2 сая төгрөгөөр торгуулж, үүний 420 мянган төгрөгийг нь л төлжээ.