Монгол Улсын Үндсэн хуулийн цэцийн дунд суудлын хуралдаан үргэлжилж байна

Г. Жавхлантгарьд:
Монголчуудын амьдрал- Мэдээ мэдээлэл

2021-04-16, 535

Монгол Улсын Үндсэн хуулийн цэцийн дунд суудлын хуралдаан үргэлжилж байна. Уг хуралдаан өглөө 09:00 цагт эхлэх товтой байсан ч Цэцийн гишүүн Ц.Нанзаддорж хуралдаанд оролцохоос татгалзсан тул түр хойшилсон. Ингээд Ц.Нанзаддоржийн оронд Ж.Эрдэнэбулганыг оролцуулан, 15:00 цагт хуралдаж эхэлсэн юм. Энэхүү дунд суудлын хуралдааны эцэст Х.Баттулга Ерөнхийлөгчийн сонгуульд дахин нэр дэвших боломжтой эсэх нь шийдэгдэх юм.

Тодруулбал, УИХ-ын гишүүн Т.Доржханд, хуульч Н.Үүрцайх, МУИС-ийн багш, доктор О.Мөнхсайхан нарын нэр бүхий хүмүүс Монгол Улсын Үндсэн хуулийн цэцэд хандаж, УИХ-аас 2020 оны арван хоёрдугаар сарын 24-ний өдөр баталсан Монгол Улсын Ерөнхийлөгчийн сонгуулийн тухай хуулийн 3 дугаар зүйлийн 3.1.2 дахь заалт, 5 дугаар зүйлийн 5.4, 5.6, 26 дугаар зүйлийн 26.2 дахь хэсэг Үндсэн хуулийн зарим заалтад нийцээгүй байна гэсэн санал хүргүүлсэн юм.

Ерөнхийлөгчийн сонгуулийн тухай хуулийн Үндсэн хуульд нийцээгүй гэх заалтууд:

3 дугаар зүйл.Хуулийн нэр томьёоны тодорхойлолт

3.1.2.“нэр дэвшигч” гэж 50 нас хүрсэн, сүүлийн таваас доошгүй жил эх орондоо байнга оршин суусан, Монгол Улсын Үндсэн хууль болон энэ хуульд заасны дагуу Монгол Улсын Ерөнхийлөгчид нэр дэвшин бүртгүүлж, нэр дэвшигчийн үнэмлэх авсан Монгол Улсын уугуул иргэнийг;

5 дугаар зүйл.Монгол Улсын иргэний сонгох, сонгогдох эрх

5.4.50 нас хүрсэн, сүүлийн таваас доошгүй жил эх орондоо байнга оршин суусан, Монгол Улсын Үндсэн хууль, энэ хуульд заасан бусад шаардлагыг хангасан Монгол Улсын уугуул иргэн Ерөнхийлөгчөөр сонгогдох эрхтэй.

5.6.Монгол Улсын иргэний сонгох, сонгогдох эрхийг хууль бусаар хязгаарлах, сонгогчоос саналаа чөлөөтэй илэрхийлэхэд хөндлөнгөөс нөлөөлөх, саад учруулахыг хориглоно.

26 дугаар зүйл.Ерөнхийлөгчид нэр дэвшүүлэх нийтлэг журам

26.2.Нэр дэвшигч хуульд заасан нийтлэг шаардлагаас гадна дараах шаардлагыг хангасан байна:

26.2.1.банк, бусад хуулийн этгээд, иргэнд шүүхийн шийдвэрээр тогтоогдсон төлбөл зохих зээл, барьцаа болон батлан даалтын өр төлбөргүй байх;

26.2.2.татварын хугацаа хэтэрсэн өр төлбөргүй байх, аль нэг компанийн 51 ба түүнээс дээш хувийн хувьцаа эзэмшдэг бол тухайн компани нь албан татварын хугацаа хэтэрсэн өргүй байх;

26.2.3.сэтгэцийн эмгэггүй байх.

Монгол Улсын Үндсэн хуулийн цэцийн дунд суудлын хуралдаан үргэлжилж байна