Өнгөрсөн долоо хоногт Засгийн газраас хатуу хөл хорио тогтоож, иргэдэд 300 мянган төгрөгийн дэмжлэг үзүүлсэн. Үүнтэй холбоотойгоор өргөн хэрэглээний бараа бүтээгдэхүүний үнэд өөрчлөлт орсон эсэх талаар ШӨХТГ-ын дарга Б.Бат-Эрдэнээс тодрууллаа.

Тэрбээр “Дөрөвдүгээр сарын есний өдрөөс хойш өнөөдрийг хүртэл хяналт шалгалт үргэлжилж байна. Энэ хугацаанд 500 гаруй зах, худалдааны төв, хүнсний дэлгүүрүүдэд хяналт шалгалт хийсэн. Бараа бүтээгдэхүүний үнэ тодорхой түвшинд өссөн байна. БНХАУ,ОХУ хилээ хааснаас үүдэн импортын бараа бүтээгдэхүүний үнэ тодорхой хэмжээнд өссөн. Дөрөвдүгээр сарын есний өдөр иргэн бүрд 300 мянган төгрөг тарааснаас үүдэн “Хүчит шонхор” зах дээр махны үнэ кг тутамд 4030 төгрөгөөр нэмэгдсэн. Үүнийг үнийн хөөргөдөл үүсгэсэн зөрчил хэмээн үзсэн. Уг зөрчлийг арилгуулахаар “Хүчит шонхор” захын хоёр лангуунд тус бүрд нь хоёр сая төгрөгийн торгууль ноогдуулсан. Түүнээс хойш өнөөдрийг хүртэл махны үнэ хэвийн байна. “Хүчит шонхор” зах махны бөөний ганц зах болоод байна. Бидний хувьд Сонгинохайрхан дүүргийн иргэд хаа байсан Чингэлтэй дүүрэгт ирж мах авах нь зөв үү гэж ярилцаж байна. Махны ганц бөөний төв болсноороо Засгийн газраас хэрэгжүүлж буй хөл хорио хэрэгжихгүй, бөөгнөрөл үүсэж, тодорхой хэмжээний үнийн хөөргөдөл үүсээд байна. Мөн “Хүчит шонхор” зах 2018 оноос хойш тохирлын гэрчилгээгүй, 2020 оны зургаадугаар сараас хойш 10 сар зөвшөөрөлгүй үйл ажиллагаа явуулсан байна. Өнөөдрийн хяналт шалгалтаар газрын зөвшөөрөл алга. Ер нь байгаа зөвшөөрөл алга. Бусад худалдааны төвүүд дээр ганцхан зөвшөөрөл байхгүй байхад хаана, бооно. Гэтэл “Хүчит шонхор” зах ямар ч зөвшөөрөл байхгүй, эрүүл ахуй, үнийн хөөргөдлийн ноцтой зөрчил гаргаж байхад хэвийн ажиллаад байдаг юм бэ. Үүнийг тодруулахаар ажиллаж байна. Мөн төрийн байгууллагын хариуцлагатай холбоотой асуудлыг Шадар сайдад хүргүүлнэ” гэлээ