Иргэн Б.Сүндэръяа цахим орчинд УИХ-ын гишүүн, нэр бүхий эрхэм биед нь халдсан, бэлгийн дарамт үзүүлсэн гэх мэдээллийг цацсан. Үүний дараагаар УИХ-ын гишүүн Ц.Анандбазарт хүчиндүүлсэн, бэлгийн дарамтад өртсөн гэх эмэгтэйчүүд цахим орчинд давалгаалж эхэлсэн. Үүнтэй холбоотойгоор Хүний эрхийн үндэсний комиссоос мэдээлэл хийлээ.

Хүний эрхийн үндэсний комиссын гишүүн Х.Мөнхзул “2020 оны дөрөвдүгээр сарын 11-ний өдөр иргэн Б.Сүндэръяа нэр бүхий УИХ-ын гишүүн өөрийнх нь халдашгүй дархан эрхэд халдаж, бэлгийн дарам үзүүлсэн талаар мэдээлэл хийсэн. Энэ мэдээллээс үүдэн УИХ-ын гишүүн Ц.Анандбазарын удирдаж байсан байгууллагуудад ажиллаж байсан эмэгтэйчүүдэд бэлгийн дарамт учруулан, бэлгийн хүчирхийлэл үйлдэж, заналхийлдэг гэх мэдээллийг цахим орчинд цацаж байна.

Монгол Улсын Үндсэн хуульд заасны дагуу хохирогч гомдол, мэдээллээ холбогдох байгууллагад өгөх боломжтой. Иймд хохирогч эмэгтэйчүүд гомдлоо Цагдаагийн ерөнхий газар болон Хүний эрхийн үндэсний комисст хүргүүлж хамтран ажиллахыг уриалж байна. Мөн цахим орчинд гарсан эмэгтэйчүүдийг хүчирхийлсэн, заналхийлсэн гэх гэмт хэргийн агуулгатай мэдээллийг яаралтай шалгаж, үр дүнг Хүний эрхийн үндэсний комисс, олон нийтэд танилцуулахыг цагдаа, прокурорын байгууллагаас шаардаж байна. Эдгээр гомдол, мэдээллийг шалгах явцад гэрч, хохирогч нарын аюулгүй байдлыг хангаж буй байдалд Хүний эрхийн үндэсний комиссоос хяналт тавьж ажиллана.

Цахим орчинд гарсан гомдол, мэдээллийн талаар албан ёсны байр сууриа илэрхийлэхийг УИХ-ын гишүүн Ц.Анандбазар танд зөвлөж байна. Мөн УИХ-ын ёс зүйн хороо гомдол мэдээллийг шалгаж гэм буруутай гэдэг нь тогтоогдвол хариуцлага тооцохыг шаардаж байна” гэлээ.